Вести › Набрзинка

Сведоштво на мајка на млад загинат во Пулс

29 December 2025

Од сведочењето на Марија Петрушева, мајка на загинатиот 24-годишен Андреј:

- Андреј, кој планирал повторно да замине на работа во Хрватска, последен пат се јавил во 18:30 часот, велејќи дека е преморен.

- Со сопругот отидовме на тераса и видовме како небото свети во далечината, токму таму каде што е ‘Пулс’. Знаев дека таму има концерт на ДНК и веднаш почнав да им ѕвонам на двајцата синови. На Андреј му пишав и на Инстаграм во 3:10 часот, но пораката до денес стои непрочитана.

-Едно дете ме слушна како викам и ми рече: ‘Вујно, Кристијан е добар, а Андреј имаше слаб пулс, ги однесоа со амбулантна кола’. Тогаш почувствував надеж, мислев дека штом се во болница, веќе им се помага. Не сфаќав дека децата што ги гледам легнати на земја се мртви, мислев дека се само онесвестени од чадот.

- Кога ме виде, Кристијан само ми рече: ‘Мамо, не успеав да го спасам брат ми’. Влегов во собата број 2. Андреј лежеше таму, изгледаше толку живо што не верував дека е мртов. Му дававме вештачко дишење, мислев дека испушта звуци, дека се враќа… Го молев докторот што поминуваше да направи нешто, тој му го фати пулсот и ми рече дека веќе се лади. Ми кажа дека и останатите три деца во собата се починати.

За трагедијата се обвинети 35 физички и три правни лица. За обвинителството, „Пулс“ не била несреќа, туку резултат на долгогодишно беззаконие. Дискотеката работела незаконски уште од 2012 година, без соодветна противпожарна заштита, со нерегистрирани реконструкции и без исполнување на минималните технички услови за безбедност на посетителите, известува СДК.

извор

Дури 73% од младите во Брисел немаат европско потекло

29 December 2025

Демографските податоци за Белгија покажуваат длабоки промени во етничкиот состав на населението, особено во главниот град Брисел.
Само 10,56% од жителите на Брисел на возраст до 17 години се со потекло од Белгија. Другите 89,44% или се родени во странство или се деца на имигранти.
Огромно мнозинство од 72,9% од малолетниците што живеат во Брисел имаат потекло надвор од Европската Унија, покажуваат податоци од агенцијата за статистика Статбел. Овие податоци ги демантираат тврдењата дека повеќето доселеници во градот се од други европски земји, затоа што во Брисел се концентрирани институциите на ЕУ.
На национално ниво, сликата е мошне поинаква. Две третини од населението е со белгиско потекло, 22% се со странски корени, а 13,8% се имигранти што немаат белгиско државјанство. Во Валонија 64% од населението е со белгиско потекло, а само Фламанскиот регион 71,9%.

извор

Трамп: Путин сака Украина да успее

29 December 2025

Украина и Русија се „поблиску до мировен договор од кога било досега“, но преговорите се сложени и сè уште постои опасност да пропаднат, изјави Доналд Трамп по средбата со украинскиот претседател Володимир Зеленски на Флорида и по телефонскиот разговор со рускиот лидер Владимир Путин.

Трамп додаде дека прашањето за безбедносните гаранции за Украина е „решено 95%“. Тој го пофали Путин поради настојувањето што побрзо да биде отворена нуклеарната централа Запорожје, која од првите месеци по инвазијата е под руска контрола.
„Путин сака Украина да успее“, изјави Трамп, истакнувајќи дека Русија ќе помогне за реконструкцијата на Украина.

Американскиот претседател посочи дека може да потрае „неколку недели“ за да се постигне договор и рече дека е веројатна тројна средба со Зеленски и со Путин.

извор