Bookbox › Набрзинка

Пријави нов збор за првата Зборотворба на годината

12 August 2025

Јазичната иницијатива „Зборци“ го најавува првото издание на „Зборотворба на годината“ – настан посветен на создавање, славење и негување на новите зборови во македонскиот јазик. Настанот ќе се одржи во септември 2025 година, во чест на 80-годишнината од кодификацијата на македонскиот литературен јазик.
Од „Зборци“ велат дека овој настан е резултат на идеја која долго време живеела во заедницата, пренесувана од една генерација на љубители на јазикот на следната. „Зборотворба на годината“ е аманет што сега станува реалност (види: Манифестот кој требаше да се случи)

Повикот на Инстаграм (бараат и волонтери)

Вашите предлози тука. Рокот за испраќање е 1 септември.

извор

Смилево беше европска лабораторија за алтернативна фотографија за време на „Зрно“

11 August 2025

Околу педесет фотографи, студенти по визуелни уметности и млади автор(к)и од цела Европа, заедно со волонтери од Македонија, Србија и Словенија, учествуваа на седмото издание на фестивалот „Зрно“ – платформа посветена на алтернативни и благородни историски фотографски процеси. Собирот се одржа во манастирот „Св. Петар и Павле“ во Смилево од 17 до 23 јули.
Наместо класична школа, уметничка колонија или резиденција, „Зрно“ понуди простор за игра, експерименти и длабинско истражување на заборавените благородни фотографски техники. Се изработуваа цијанотипии, колодиумски плочи, гумени печати, лумен принтови итн., со целосна слобода во истражувањето и многу уживање – често со користење локални материјали, природна светлина и импровизирана опрема.
Избор на негативи од опусот на браќата Манаки, љубезно отстапени и скенирани од Архивот на Македонија – одделение Битола, беа користени и интерпретирани во некои историски техники, и им беше даден нов живот и современа интерпретација, како начин да се оддаде почит кон нивното дело како дел од соработката на „Зрно“ со Архивот на Македонија.

извор

Промоција на „Калиграфи на филмското писмо“ од Влатко Галевски

9 August 2025

На 9 август (сабота) во Кинотека на Македонија, во рамките на програмата на шестото издание на „Флипбук филм фестивал“ (7-10 август) со почеток во 19:00 часот ќе се одржи промоцијата на новата книга на Влатко Галевски, со наслов „Калиграфи на филмското писмо“. Книгата во разговор со авторот ќе ја претстават Александар Прокопиев и Јане Алтипармаков.
Филмофилското издание на Галевски понудува иновативен филмолошки концепт во толкувањето на делата на дванаесет мајстори на филмскиот занает како: Вим Вендерс, Жак Тати, Рој Андерсон, Шантал Акерман, Ингмар Бергман, Ањес Варда, Андреј Тарковски, Бела Тар, Дејвид Линч, Акира Куросава, Ларс фон Трир и Аки Каурисмаки.
„Структурата на ‘Калиграфи’ е прилагодена на триетапниот приод на Галевски во разоткривањето на творечките лавиринти кај секој еден од одбраните режисери. Во првата етапа тоа е преку есеизираниот портрет на режисерот, во втората, насловена како ‘Референца’, совпаѓањето на неговата филмска постапка со мајсторството во определен занает, во третата етапа замислената случка (поткрепена со неколку вистински факти) се пишува во облик на сосем лична мини проза, фикција во која режисерот е лик.

извор