Писателот Миљенко Јерговиќ пред неколку дена објави на Фејсбук дека бил вербално нападнат во Загреб. Како што пишува, седел со пријателка пред книжарницата „Фрактура“ и пиел кафе, кога поминал постар пар – маж со куче и жена зад него. Жената застанала, се загледала во него и извикала само еден збор: „Гомно!“.
Јерговиќ опишува дека за миг му се причинило како жената да доаѓа од 1941 година, од времето кога на локацијата се наоѓало едно од најстрашните загрепски мачилишта. Неговата сопруга Ана реагирала без двоумење – тргнала по жената за да ја фотографира. Тогаш таа, видно разјарена, ја нападнала физички, обидувајќи се да ѝ го грабне телефонот од рака.
Јерговиќ забележува дека агресивноста и самоувереноста на таа непозната жена не се случајни, туку е резултат на општествената клима, политиката на владата на Пленковиќ и постапувањето на хрватската полиција.
Ситуацијата завршила кога случајна минувачка застанала во близина, а агресорката се повлекла, бидејќи, според Јерговиќ, ваквите луѓе најмногу се плашат од сведоци и од слободни граѓани подготвени да сведочат.
Тој објави и фотографија од жената, но нагласи дека нема да го пријави случајот во полиција. Како причина наведува дека тоа би било губење време и дополнително понижување, со оглед на неговите претходни искуства и на, како што вели, начинот на кој полицијата генерално постапува.
Вчера, 28.08. приказната продолжи со тоа што на фасадата на зградата во која живее Јерговиќ осамна графит: „Една августовска ноќ Миљенко нема добро да помине - наша држава, наши правила“. Дел од јавноста реагираше на ова дека заканите кон Јерговиќ претставуваат „опасен чин на заплашување и обид за воведување на фашистичка реторика во јавниот простор“.
На сомнежите на Јерговиќ дека зад сето ова стои власта, од таму цинично реагираа дека „е сосема извесно и проверено дека премиерот и министрите под плаштот на ноќта ги испишувале спорните пораки, како што и редовно прават“.
Букбокс интервју со Јерговиќ со исто толку циничен наслов тука
