Според експертите, невоспитаност е секое однесување, коментар или гест кој отсликува непочитување и го нарушува очекуваниот ред на однесување. Тоа може да биде директно – како прегрубо вербално обраќање – или индиректно, на пример, гледање во телефон додека некој ви зборува. Често има и недоразбирање: не знаете дали некој намерно ве изигнорирал или едноставно не ве забележал.
Постојат и практични примери за (не)воспитаност: зборување на спикерфон во јавност – непристојно, особено во затворен простор, на пример во јавен превоз; пишување порака доцна навечер – не е невоспитано, бидејќи секој може да ги подеси нотификациите или да го стави телефонот на мјут; праќање службен мејл за време на викенд - не е проблем ако не се очекува одговор веднаш, плус види претходно; џвакање гласно – невоспитано; спуштање на седиште во авион цело време – исто така непристојно.
Важно е да се разбере дека културниот контекст, генерацијата и блискоста со другите ја менуваат нашата проценка. На пример, младите што пораснале со технологија можат да го сметаат користењето телефон во друштво за нормално, додека повозрасните тоа го сфаќаат како невоспитаност. Истиот чин може да биде прифатлив во еден амбиент, а неприфатлив во друг (зборување на висок тон во кафана и во болница). Освен тоа постојат и културолошки разлики: во САД е нормално да се јаде на улица, но во Јапонија тоа може да изгледа несоодветно.
Накусо, и покрај непостоењето универзални правила за „пристојно“ и „непристојно“, ова не смее да се користи како изговор за немање осет за другите, за нивниот мир, ментално и физичко здравје. Нормите на пристојноста се усвојуваат од мали нозе но и се имитираат, од постарите и родителите. Само наместо генеричкото „немој така, срамота е“, потребно е и мало дообјаснување за да се сфати логиката зад одредена норма и тоа дека нејзиното почитување има синџирест ефект - ако ние пуштаме наша гласна музика на плажа, тогаш не смееме да се буниме ако некој друг тоа го направи во собата до нас. Просто, дел сме од прекршувањата, кои после одредена граница стануваат нормала.
