Вести › Набрзинка

Во Британија ќе се гласа со наполнети 16 години

17 July 2025

Од следните избори во Британија право на глас ќе имаат и тинејџерите со наполнети 16 години. Тоа ќе донесе околу 1,5 милион нови гласачи.
Границата досега беше 18 години. Шкотска и Велс веќе ја спуштија на 16 години за регионалните избори.
„Ако се доволно возрасни за да работат, да плаќаат данок и да служат војска, зошто да не можат да гласаат“, вели лабуристичкиот премиер Кир Стармер.
„Како може да гласаат, ако немаат право да склучат брак, да одат во војна или да се кандидираат на избори“, возвраќаат ториевците, кои се против одлуката.
Ќе се променат и други услови за гласање. За идентификација ќе може да послужи платежна картичка од која било британска банка. Ќе се заострат условите за донации за да се спречи мешање во изборите од странство. Сега секоја британска компанија може да донира во кампања, без оглед кога била основана, кои се сопствениците и од каде ѝ се парите.

извор

Волт во Хрватска штрајкуваат

17 July 2025

Доставувачите на платформата Волт во Хрватска за денес закажаа штрајк „поради драстичниот пад на приходите, намалувањето или укинувањето на бонусите, неподносливите услови за работа и систематските закани кон работниците кои се обидуваат да преземат колективна акција“.
Од компанијата реагираа дека жалат што дел од доставувачите се решиле на ваков чекор но дека поголемиот дел од нив се задоволни од соработката со Волт и дека слободата и флексибилноста - да работат кога и колку сакаат - остануваат клучни причини што ја избрале таа платформа.
„Работам 12 саати дневно, шест дена во неделата, соба плаќам 350 евра, скутер и гориво 500, тука се и Волт, даноци.... Знаете ли колку ми останува на крај?“, вели за Јутарњи еден од доставувачите, Индиецот Анураг.

извор

САД кратат 9 милијарди за странска помош и јавни медиуми

17 July 2025

Сенатот на САД го одобри барањето на претседателот Доналд Трамп за кратење 9 милијарди долари од федералното финансирање на странска помош и јавни медиуми. Законот беше усвоен со мнозинство од 51-48 гласа.
Речиси една половина од кратењата (4,15 милијарди) се за програми за поддршка на економиите и демократските процеси во земји во развој.
Ќе бидат скратени уште околу 4 милијарди за разни хуманитарни програми низ светот за обезбедување засолништа, храна, вода и санитарни услови за раселени лица поради војни или хуманитарни катастрофи.
Се крати и 1,1 милијарда долари од Корпорацијата за јавна радиодифузија, што е еднакво на нејзиниот двегодишен буџет. Корпорацијата дистрибуираше 70% од средствата за поддршка на повеќе од 1.500 локални радија и телевизии, и 30% за Националното јавно радио (НПР) и Јавниот радоидифузен сервис (ПБС).

извор