Во текот на изминатите 20 години, онлајн насловите на новинските статии станале непотребно долги, полни со негативен набој и фокусирани на „кликовите“. Ова е заклучокот на студија во списанието Humanities and Social Sciences Communications објавена во март оваа година од истражувачи од Институтот за човечки развој Макс Планк.
Тие го споредуваат интернет со голем пазар каде новинарите ги користат насловите за да се натпреваруваат за внимание на читателите. Тоа е скапоцен ресурс во дигиталното доба, со оглед на тоа што содржините можат да се произведуваат поевтино отколку кога и да е претходно, што резултира со прекумерна понуда и остра конкуренција за да се освои интересот на читателите.
Во ова клучна улога играат насловите. Но за разлика од оние во печатените медиуми, успехот на секој поединечен онлајн наслов може да биде мерен во број на кликови. Истражувачите велат дека ова води кон менување на стилот на пишување наслови, кој систематски се менува прилагодувајќи се на притисоците на дигиталната околина.
Анализата се фокусирала на лингвистички и структурни промени во насловите од 2000-тата наваму. „Кликбејт“ насловите постепено се пишуваат така за да рефлектираат конверзациски тон (на пример прашање) и да поттикнуваат љубопитност без да откриваат премногу информации. Се користат активни глаголи, заменки како „јас“, „ти“ или „тие“ и повисока фрекфенција на зборови како „како?“, „што?“, „зошто?“ кои подразбираат одговор во текстот. Ако некогаш насловот можел да биде „Земјотрес во Мексико“, сега тој може да гласи „Нема да ви се верува што се случи во Мексико“ или „Колку жртви однесе земјотресот во Мексико?“.
Постои и промена во емоционалниот тон. Во просек, тој станал понегативен и во медиуми кои се сметаат за висококвалитетни и во оние таблоидните. Исто така, медиумите поврзани со десничарска идеологија користеле наслови со негативни конотации многу почесто од оние поврзани со левицата или со неутралните.
Овие промени не се резултат на поединечни уреднички одлуки, туку го рефлектираат процесот на „културна селекција“. Одредени лингвистички особини доминираат едноставно поради тоа што се поуспешни во услови на економија на дигитално внимание. Тие се користат сè почесто, понекогаш и без да бидат забележани како такви од читателите. Целиот развој дополнително се засилува од алгоритмите за препорака на социјалните медиуми.
Студијата е базирана на податоци од четири меѓународни портали - Њујорк Тајмс, Гардијан, Тајмс оф Индија, Еј-би-си Њуз Австралија, како и големиот корпус Њуз он д веб, кој содржи околу 30 милиони дополнителни наслови од различни земји.
Види претходно: 10 песни составени од наслови на офф.нет
