На германскиот остров Боркум во Северното Море, со население од 5000 жители, вечерта на 5 декември се одржува нешто слично на карневал, со фокус на младите и се уште неженети мажи. Тие се облечени во традиционална облека на тн. Клаасом, стар и лут човек кој личи на Дедо мраз, но со многу по „селски“ изглед. Овој лик ги посетува домовите и собирите, често придружен од „помагачи“ за да ги исконтролира децата, дали се воспитани и дали си ги вршат задачите, па оние кои го прават тоа биваат наградени, а другите „предупредени“.
Подоцна во текот на ноќта мажи од различни возрасти се предизвикуваат на вид боречки меч. Овој дел е затворен за туристите и новинарите. Но лани една група новинари од јавниот сервис НДР тајно снимиле група, таканаречени „фаќачи“, кои ги држат жените додека Клаасомс ги удира по бутините со рог од бик. Луѓето наоколу, вклучително и деца, навиваат додека една од жените е „тепана“.
Репортажата на НДР вклучи и три жени и поранешен жител на островот кои учествувале во ритуалот, но кои сега го критикуваат. Сепак, некои од нив и во емисијата тоа го прават со скриени лица, плашејќи се дека заедницата ќе ги осуди. Објаснувањето на организаторите е дека тоа е „чисто машки ден“, дека така се правело со векови и дека нема ништо насилно и лошо во традицијата. Од друга страна, анонимни островјани истакнуваат дека мажите се чувствувале гордо доколку жената не можела да седи неколку дена по удирањето, од модринки и повреди.
По реакциите во медиумите, властите на Боркум издадоа соопштение дека оваа година тепањето жени нема да биде вклучено во обредот, но истовремено дека новинарската репортажа „отсликува извитоперена слика на фестивалот и содржи бројни новинарски неточности“.
По ова соопштение 150-200 жени од Боркум протестираа ЗА зачувување на контроверзниот ритуал. Сите овие контроверзи резултираат со зголемени безбедносни мерки од полицијата, која и претходно имала работа поради алкохолозирани учесници и „колективна анархична енергија“.
