Приказната е следна: Музејот на стара и нова уметност (MONA) од Хабарт, Тасманија, во 2020 отвара изложба под наслов „Салон за дами“ (Ladies Lounge) која смеат да ја посетат само жени. За да ја истражи мизогинијата и патријархатот, таа го користи концептот на старовремски австралиски паб, стереотипно шовинистичка околина од која жените биле исклучени до 1960-тите, превртувајќи го на глава. Сега тука смеат да престојуваат само жени, на кои им сервираат шампањ симпатични и понизни машки келнери - единствените мажи на кои им е дозволено да бидат тука. Сценографијата е дополнета со зелени свилени завеси, венецијански лустери, елегантни троседи во фалусоидна форма, пригушено светло и дела од Пикасо и австралиската уметница Сидни Нолан.
Но пред една година Џејсон Лау, кому не му било дозволено да ја посети поставката, се пожалил на родова дискриминација. Поднел тужба и судот во Тасманија неодамна пресудил во негова корист. Аргументот на Лау бил дека музејот ги прекршил антидискриминаторните закони со тоа што не обезбедил „правична достапност до добра и услуги во согласност со законот“.
Музејот од своја страна тврди дека чувството на исклученост и дискриминација всушност и била клучно за инсталацијата и дека во тој контекст целата работа е легитимна. Но судот не мисли така и наредува музејот да почне да пушта мажи.
Сега, Кирша Каечел, креаторката на салонот, наоѓа начин како да ја „хакне“ одлуката, трансформирајќи дел од просторијата во женски тоалет, а дел во црква. Ова го прави затоа што според важечките австралиски закони, одредена личност може да биде дискриминирана врз основа на родот во религиска смисла - ако тоа се бара од доктрините на верската институција, како и во контекст на употреба на простории за кои „разумно се очекува“ да ги користат лица од само еден пол (значи, ВЦ-иња). На овој начин и законски мажите нема да имаат пристап до салонот, освен во неделите, кога тие ќе можат да влезат но под услов таму да учат да пеглаат и да постилаат веш.
Каешел вели дека во оваа смисла тужбата на г-дин Лау всушност излегла многу корисна и отворила фасцинантни нови можности. Доколку ова не профункционира, таа има намера да оди до Врховен суд.
