„Големиот бран кај Канагава“ на Хокусаи (1760-1849) се здоби со обновена популарност по катастрофалниот земјотрес и цунамито кои ја погодија Јапонија во 2011. Иако на самата слика нема прикажано цунами, туку само огромни запенети бранови, таа се толкува како визуелизација на ужасите на морето, со спокојното величество, планината Фуџи, во позадината.
Всушност, целата серија графики првично била наречена „Триесет и шест погледи на планината Фуџи“ (иако поради бараноста на крај испаднале 46), но оваа конкретна слика некако успеала да се издвои по својата драматичност. Се смета дека од неа на времето се направени 5000 копии, што значи дека и тогаш таа нешто им кажувала на купувачите.
Ова има врска со начинот на кој Јапонците ги разбирале поморските катастрофи - како нешто што спаѓа во Божји раце. Но бротчето прикажано во една таква ситуација (а кое тешко се забележува помеѓу брановите) е тесно, такво што постигнува големи брзини, но е и прилично нестабилно. Ваквите пловила се викале „ошиокури-буне“, а нивната главна функција била да носат свежа риба и други значајни производи на пазарот во Едо (денешно Токио). Оттаму, заканата по него симболизира и закана по опстанокот на заедницата. Истовремено, тие се во сопственост на трговци кои ги ризикуваат животите на нивните најмени морнари за високи профити.
Гледајќи ја сликата се прашуваме - што се случило понатаму? Но присуството на вулканот чиј врв е прекриен со снег, планината Фуџи, можеби ни дава скриен одговор на ова прашање. Eдно од значењата на „фу-џи“ е „бесмртен“. Планината означува спас среде разбрануваното море.
Од ликовен аспект, „Големиот бран“ е значајна поради употребата на посебната, „берлинско“ или „прусиско“ сина боја, првиот модерен синтетички пигмент, кој во 1830-тите пристигнал во Јапонија и бил доволно евтин за да се користи за печатење. Таа во Јапонија се нарекува „беро“ (по Берлин) и предизвикала радикални промени во историјата на јапонските графики. Хокусаи бил меѓу првите кои ги правел сините неба уште посини и сините води уште поживописни, во споредба со старата боја употребувана за оваа цел, индиго-то.
