Одбраните изрази се на англиски, но ќе се обидеме да ги преведеме, со оглед на тоа што нивното значење ни е познато (иако можеби немаме збор за „тоа“).
Blursday (маглоден)
Оваа година поинаку се доживува минувањето на времето - деновите изгледаат како недели, а од друга страна месеците ни пролетаа. Звучи парадоксално, но веруваме дека и вам ви е исто. Рутината на животот во карантин и/или во делумна изолација ја направи 2020-та вистинска година на мрмотот. Вашингтон пост дури воведе и њузлетер под наслов „Кој ден е денес?“.Сето ова резултираше со „маглоден“ - не сосема јасна претстава за тоа кој ден во неделата и кој датум е воопшто.
Doomscrolling (кобноскрол)
Она кога знаеш дека консумирањето лоши вести и апокалиптични статии се лоши по твоето ментално здравје ама сепак не можеш да се воздржиш. На Твитер се појави и профил на новинарката Карен К. Хо, со прекар Doomscrolling Reminder Lady која секоја вечер ги потсетува твитерџиите да си ги изгаснат компјуерите и мобилните и да се посветат малку на себеси. „Вашето време и енергија се вредни и ограничени ресурси. Се уште имате способност да се грижите за себе. Доволно вредите за да паузирате со мониторите и да си овозможите време за одмор“, мантра таа.
Зарем до таму стигнавме за некој да мора да не потсетува на ова?
Pod (мешунка, кожурец) и quaranteam (карантим)
Долго време слушавме за информациски „меури“, кои ни се формираат на социјалните мрежи и со персонализирани гугл пребарувања. „Под“ е исто така начин на социјално и физичко изолирање, при што контакт се одржува само со мала група пријатели и со семејството. Да одлучиш кој спаѓа во „кожурецот“ и да имаш доверба во нив е голема работа, за оние кои имаат можност воопшто да бираат.
Unprecedented (без преседан)
Иако во првите недели од пандемијата имаше ефект, ова е еден од зборовите кои набргу се потрошија. Доволно е да се погледне оваа супер-монтажа на реклами на различни компании од средината на април до сега за да се добие морничаво чувство на копи/пејст на една и иста атмосфера. Да, ваква воедначеност е без преседан во историјата на рекламирањето.
