Bookbox › Набрзинка

Водич низ книжевните клубови во Скопје

3 март 2026

На блогот Кирилична поддршка (КП) направен е одличен пресек на постоечки и активни книжевни клубови во Скопје.
Клубот на читатели на градската библиотека „Браќа Миладиновци“ исчитува современи македонски дела, комбинирано со неформална средба со авторите. Модератори се библиотекари. Кампањата постои од септември 2022 и до сега се направени 28 разговори.
Средбите на книжевниот клуб „Илика“ се одржуваат еднаш до два пати месечно, а пријавувањето се одвива преку испраќање на порака на мејл-адресата на книжарницата. Наредната средба е за закажана за 11 март и е посветена на графичкиот роман „Адна“ од Самира Кентриќ.
Читачкиот клуб на онлајн феминистичката платформа „Медуза“ е единствениот клуб фокусиран на есеи. На средбите се читаат феминистички/квир есеи од авторки како Урсула К. Ле Гвин и Одри Лорд, преведени на македонски.
„БукНук“ е најбројниот и најактивен клуб на читатели моментално кај нас. Основан во 2024 од Елена Василевска, а поттикнат од нејзината желба да најде друштво за читање, денес клубот брои над 500 членови кои се дружат на нивните канали. Активностите на клубот вклучуваат месечни селекции на книги, книжевни предизвици и креативни работилници.
„Пат кон Истокот“ постои од лани и е започнат на иницијатива на Пагода и Македонско-јапонското друштво за пријателство и соработка. Книжевниот дел од клубот е посветен на автори од Источна Азија - читање, анализа и разговор за дела преведени на македонски, англиски или други јазици, a се состанува секои 3 месеци.

Како да ги следите и да се придружите на линкот.

извор

На 88-годишна возраст почина писателот Јован Павловски

24 јуни 2026

Денеска (24.06.) во Скопје почина Јован Павловски, македонски енциклопедист, поет, раскажувач, романописец, писател за најмладите, публицист. Во три мандата беше претседател на Друштвото на писателите на Македонија, долгогодишен уредник на повеќе рубрики во „Нова Македонија“, нејзин дописник од Париз и Москва.
Јован Павловски е роден во Тетово, на 10 септември 1937 година. Од 1980 до 1986 г. е професор по теорија и практика на новинарството на Интердисциплинарните студии по новинарство на Универзитетот „Кирил и Методиј“ во Скопје. Член на Друштвото на писателите на Македонија од 1962 год, во три мандати (1992-1994, 1994-1996, 2007-2008) негов претседател, член на Македонскиот ПЕН центар.
Автор е на педесетина книги проза и поезија, меѓу кои култниот роман „Сок од простата“, која веднаш по појавувањето во 1990 година, ги разбранува литературните и културните води во Македонија. Како публицист, потпишува редица книги главно поврзани со конструирањето на македонскиот идентитет и борбата на Македонецот за сопствена држава. Како енциклопедист е главен уредник на Личности од Македонија (Петар Карајанов, Христо Андоновски, Јован Павловски, соавтор и уредник, 2000, најдобро издание на Меѓународниот скопски саем), Сто македонски години (група автори, соавтор и уредник, 2003, најдобро издание на Меѓународниот скопски саем), „Ми-анова енциклопедија, општа и македонска“, во четири тома (група автори, соавтор и уредник, 2006, најдобро издание на Меѓународниот скопски саем), Кратка Ми-анова енциклопедија, ликовна уметност (2007, група автори, соавтор и уредник Јован Павловски), четири тома хронолошка енциклопедија за историјата на Македонија од неолитот до 2003 г., група автори, соавтор и уредник: Јован Павловски) и други.

извор

Уште успеси на наши луѓе

23 јуни 2026

Од јули 2026 проф. Мирко Трајковски, по потекло од Скопје (попрецизно - Буњаковец), со завршен Фармацевтски факултет на УКИМ, е Директор на Одделението за клеточна физиологија и метаболизам при Универзитетот во Женева. Тој е професор на Факултетот по медицина на истиот универзитет од 2013.
Проф. Трајковски раководи со интердисциплинарен истражувачки тим кој се занимава со најнови експериментални технологии и ин витро модели за да се открие како метаболитичките процеси влијаат врз сложени болести вклучувајќи дијабетес, прекумерна тежина и рак.
Тој и неговиот тим развиле иновативен метод за откривање на колоректален карцином преку анализа на бактериите во цревниот микробиом, кој е многу помалку инвазивен и речиси подеднакво точен како колоноскопијата.

Подетално за патот на Трајковски во интервју за факултети.мк од 2017.

извор