Вести › Набрзинка

Мајката која заврши трагично со ќерката дента била тепана од сопругот

3 март 2026

Младата Ивана која вчера околу 14 часот си го одзеде животот заедно своето 6-годишно дете скокајќи од тераса на висококатница во скопски Карпош, дента била натепана од сопругот Стојанче Јовановски, рече министерот за внатрешни работи Панче Тошковски.
Тој имал десет кривични пријави во изминатите две години, а само неколку часа пред трагичниот пад, полицијата интервенирала по пријава за семејна расправија.
Според службените белешки, вчера по ќотекот жената потпишала изјава со која се откажува од пријавата.
„Немавме физички контакт со сопругот, туку недоразбирање. Не барам понатамошна полициска постапка. Не станува збор за семејно насилство, брачните односи ќе ги решаваме по мирен пат, со развод“, прочита Тошковски што кажала жртвата.
Ќе се испитува дали тоа го кажала од страв, под притисок и закани од насилникот.
Сопругот на жртвата, регистриран семеен насилник, дилер на дрога и сторител на десетина други кривични дела, по вчерашната трагедија осомничен е за Наведување на самоубиство, нанесување на тешки телесни повреди и за загрозување на сигурноста.

извор

Сорос повикува да се следи примерот на Шпанија со базите

3 март 2026

Шпанската влада ја блокираше американската војска да ги користи своите бази за напади врз Иран, принудувајќи ги американските авиони да ја напуштат земјата. Зборувајќи на годишната конференција „Мобилен светски конгрес“ во Барселона во неделата, шпанскиот премиер Педро Санчез ја осуди таа војна на САД против Иран, која беше целосно неиспровоцирана.
„Некој може да биде против омразен режим каков што е иранскиот а во исто време да биде против воена интервенција која е неоправдана, опасна и надвор од меѓународното право. Тој треба да биде против војна иницирана без овластување од Конгресот на САД или Советот за безбедност на ОН“, рече Санчез.
„Европа треба да ги затвори сите американски бази на своја територија“, напиша Дејвид Адлер, ко-генерален координатор на Прогресивната интернационала. „Не може да има „стратешка автономија“ додека САД ја задржуваат можноста да вршат безобѕирно насилство од империјалните инсталации на европска територија.“
Алекс Сорос, претседател на Фондациите Отворено општество, смета дека повеќе држави треба да ја следат Шпанија за да ја ограничат агресијата на САД. „Зошто повеќе Европејци не се спротивставуваат на нелегална војна!?“, напиша Сорос. „Истото важи и за Канада! Држат убави говори на конференции, но прават малку. Шпанија станува лидер на слободниот свет!“, напиша помладиот Сорос.

извор

Мајката и детето биле сами во станот и заклучени одвнатре пред трагедијата

3 март 2026

Едно лице е задржано во полициска станица по трагичниот настан во скопско Тафталиџе, кога мајка и дете беа пронајдени мртви по пад од балкон од зграда.
По наредба на судија на претходна постапка, денеска ќе се врши детален претрес на станот во кој, според првичните сознанија на обвинителството, мајката и малолетното девојче биле сами и заклучени од внатрешната страна.
Во врска на наводите во медиумите, но и на братот на починатата жена, дека таа и нејзината ќерка биле жртви на долгогодишно семејно насилство, од Обвинителството велат дека е побарано детално известување од МВР и од Центарот за социјални работи со сите евентуални претходни пријави и поплаки од оштетената.
Дополнително, на внатрешната контрола при МВР ќе ѝ биде наредено да го испита постапувањето на полицијата по тие случаи.