Истражувачи од Бостон и Калифорнија најавуваат дека в раце имаат еден ветувачки концепт за борба против коронавирусот кој излегува надвор од рамките на досегашните тактики. Технологијата се развива долги години и би можела да има импликации не само во борбата против новиот вирус кој пандемиски се прошири туку и на другите вируси како што е грипот и еболата.
Во суштината се таканаречени нано-сунѓери кои се направени од мембрани на човечки ќелии: нано затоа што се илјада пати помали од човечко влакно а сунѓери затоа што имаат способност да впиваат токсини и патогени.
Во случајот со коронавирусот, откриле дека истите нано- сунѓери можат да служат како мамци за да го одвлечат вниманието на вирусот од неговата примарна дестинација, клетките на белите дробови и попат да го апсорбираат и да го неутрализираат. Станува збор за армија од трилиони нано -сунѓерчиња.
Наодите се лабораториски, следува експериментирање со животни па после добиена дозвола од федералната агенција за храна и лековви, концептот би се пробал и на луѓе.
„Ова е поинаков приод во развојот на еден лек. Се надевам дека другите тимови ќе дојдат до безбедни и ефикасни терапии и вакцини но ние работиме како светот да зависи од нас,“ вели доктор Жанг, професор по нано-инженерство од Сан Диего.
