Потребни состојки:
- јунешки бифтек
- 400 гр печурки (шампињони, вргањ)
- 4-6 парчиња пршут
- лиснато тесто
- сенф (по можност Дижон)
- јајце за премачкување
Бифтекот да биде свеж и на собна температура, ако е замрзнат чекајте сам да се одмрзне и да ја добие соодветната температура. Исчистете ги жилите и дајте му убава форма, бидете нежни со него.
Чекори за подготовка:
- Прво вклучете ја рерната на 200 С . Знам дека знаете за првиот чекор, но бидејќи ми се случува на сред подготовки да ми текне дека не сум ја вклучила, си велам да ве потсетам уште еднаш.
- Одберете тава што ќе го собере цел бифтек, а ако имате електрична скара дома со рамна плотна може да ви заврши многу работа. Ставете масло и чекајте убаво да се загрее, а во меѓувреме зачинете го убаво со сол и бибер од сите страни и почнете да го масирате малце за да ги впие убаво зачините. Веќе тавата е загреана, ставете го месото и брзо пржете го од сите страни додека не добие убава карамелизирана боја. Бидејќи маслото е врело веднаш ќе добие боја, затоа велам брзо пржење. Поентата на ова е да ги зачувате сите течности на месото во него т.е. да биде сочно.
- Тргнете го на страна и чекајте да се олади. Додека чекате напијте се една чаша црвено вино, подоцна ќе ви оди одлично со вашето ремек дело.
- Ок, бифтек оладен, земајте го сенфот. Цел бифтек убаво ќе го намачкате со сенф, не штедете, нека се гледа дека е намачкан и оставете го така.
- За печурките, не се мачете со сецкање, нема да постигнете, блендер е права работа. Сите печурки внатре плус сол и бибер. Смесата треба да личи на пире. Во тава загреана, без зејтин, без ништо, ставете го пирето од печурки. Ако мислите дека ќе загорат се лажете, самата печурка ќе пушти толку многу вода што нема да има потреба од масло. Се разбира ќе ги пржите додека не испари водата.
- Најдете посебно место од работната површина и на неа ставете едно големо парче целофан фолија. Врз неа наредете ги убаво парчињата пршута, не мора едно до друго, може да се преклопуваат, и врз нив пирето од печурки. Убаво нанесете сегде од пирето, рамномерно и одозгора ставете го бифтекот.
- Според големината на бифтекот ќе знаете колку парчиња пршута ви требаат. Ова што го правам јас е за двајца. Почнете да ролате, убаво завиткајте го бифтекот, фолијата на краевите убаво завиткајте ја и ставете го во фрижидер околу 15-20 мин. Формата треба да ви изгледа како салама во црево. Со ова сите состојки ќе се соединат и ќе ја задржи правилната форма.
- Уште малце и готови сме, остана уште лиснатото тесто. Со сукало (колку ли ме бркаше баба ми со сукало) поминете врз него за да се истенчи, треба да биде прилично тенко. Е сега, најпипавиот дел, извадете го бифтекот од фолијата и ставете го на средина од тестото. За понатака снајдете се сами.
- Се шалам, има две варијанти. Првата, убаво да го завиткате во едно тесто, како ролат, со тоа што краевите треба убаво да ги намачкате со јајце. И втората, едно тесто доле, бифтекот, тесто одозгора и краевите да ги виткате за убаво да го затворите. После сето ова мачење ставете го 5 мин. во фрижидер за да се стврдне тестото.
- Печката е веќе вклучена, го премачкуваме со јајце за да добие боја и го ставаме да се пече 35 – 40 мин. Со ова време ќе добиете совршен "средно накај живо " печен бифтек.
