- Украинските сили со ракети од системот Химарс и дронови ја погодиле главната пумпна станица од нафтоводот Дружба со кој Русија им доставува нафта на Унгарија и на Словачка. Поради штетата, испораката ќе биде запрена најмалку пет дена.
- Шефот на унгарската дипломатија Петер Сијарто реагираше дека ова бил трет украински напад врз пумпата Унеча во регионот Бријанск, што го протолкува како „уште еден обид да бидеме вовлечени во војна“.
- Една половина од увозот на нафта Унгарија го добива преку Дружба. Будимпешта и Братислава настојуваат да бидеат изземени од санкциите од ЕУ за Москва, кои опфаќаат целосно откажување од увоз на руска нафта до 2027 година.
- „Унгарија ја поддржува Украина со струја и бензин, а тие за возврат го бомбардираат нафтоводот од кој се снабдуваме. Многу непријателски потег! Му посакуваме на претседателот Трамп успех во неговата мисија за мир“, порача премиерот Виктор Орбан.
- Српската полиција синоќа приведе десетици лица и спречи напад врз „Пиоинирскиот камп“ на поддржувачи на Александар Вучиќ пред Народното собрание во Белград. Меѓу 37-те приведени лица е и поранешниот кошаркарски репрезентативец Владимир Штимац поради „поттикнување на насилство“.
- Десетици илјади граѓани вчера пристигнаа на платото пред Собранието за да ѝ изразат поддршка на Дијана Хрка, мајката на момче што загина при уривањето на настрешницата на железничката станица во Нови Сад пред една година. Таа почна штрајк со глад, поради тоа што властите избегнуваат одговорност за смртта на нејзиниот син и на уште 15 луѓе при трагедијата.
- Група демонстранти ги нападнале симпатизерите на Вучиќ што кампуваат пред Собранието. Фрлале камења, шишиња и пиротехника и запалиле еден шатор.
- Поранешниот претседател Борис Тадиќ ги повика граѓаните на Србија да ѝ изразат поддршка на мајката што штрајкува со глад и секоја вечер да протестираат во Белград. Оние што не можат да дојдат, ги повика да организираат протести во своите места: „Сите на улица!“. Претседателката на собранието Ана Брнабиќ го обвини Тадиќ дека повикува на насилства и граѓанска војна.
