На 24 јануари 2017 некој по име d0ughb0y качил дефиниција на сајтот Урбан речник, популарниот онлајн лексикон кој се потпира на дефиниции на корисниците. Под „Доналд Трамп“, кој четири дена претходно положи заклетва како 45-ти претседател на САД и предизвика бројни Женски маршеви ден подоцна - тој напишал: „Човекот кој поттикна поголем број дебели жени да излезат на прошетка уште првиот ден од неговото претседателствување, отколку Мишел Обама за сите осум години“.
Откако е објавена, оваа дефиниција доби 25.716 гласови и се уште се смета за топ дефиниција на Доналд Трамп. Следни по гласаност се „Човек што не ја сака Кина затоа што тие реално имаат Голем ѕид“ и „Она што хиспано-американското население го нарекува ел диабло“. И така, 582 дефиниции за Трамп, некои смешни, други глупи, но ниту една прецизна и комплетно точна.
Сајтот кој сега полни 20 години е дигитален трезор на повеќе од 8 милиони дефиниции, кои главно се однесуваат на англискиот сленг. Основан од Аарон Пекам во 1999 - тогаш студент по компјутерски науки на Калифорнискиот универзитет - Урбаниот речник стана познат заради тоа што дозволи, за разлика од напуваните лингвисти-уредници на речници од типот на Оксфордскиот и на Меријам-Вебстер, „плуралност“ во сферата на јазикот. Пекам има изјавено дека сајтот го почнал како шега, односно како начин да се потсмева со Dictionary.com. Но набрзо целата работа добила неверојатни димензии. Денес на сајтот доаѓаат 65 милиони посетители месечно, и тоа речиси 100% затоа што сакале да дојдат баш тука а не затоа што сајтот случајно им се отворил кога пребарувале некој збор.
На почетокот идејата на проектот била корективна - да ја пополни празнината во другите речници и да послужи како архива за сленгот кој се создавал исто толку бргу колку што исчезнувал. Но со текот на времето сајтот почнал да го отсликува најлошото на интернет и да станува слободен терен за говор на омраза. Расизам, хомофобија, ксенофобија и сексизам во моментов се основа за најпопуларните дефиниции на сајтот. Една од нив, за „сексизам“, на пример, гласи: „Начин на живот како социјална помош за црнци. Сега престанете да цимолите и вратете се во кујна“.
Во својата нова книга „Затоа што интернет: разбирање на новите правила на јазикот“ од лингвистката Гречен МекКулок, таа го поставува прашањето - каков вид интернет може да ја регистрира динамиката на живиот јазик? Таа ја раскажува приказната за германскиот дијалектолог Георг Венкер, кој им праќал анкетни ливчиња на наставници и ги замолувал да преведуваат реченици. И француски лингвисти подоцна го користеле овој метод, со праќање на луѓе на терен за да ги мапираат дијалектите. Ова со Урбаниот речник требало да биде нешто слично, само што „информаторите“ требало да дојдат сами.
Тоа и се случува, само што луѓето главно не се оние кои би сакале да дојдат и да остават своја пишувана трага. Освен тоа, други дигитални портали денес - Твитер, Инстаграм и други - служат како подобри инкубатори за јазикот од Урбаниот речник. Она што почнало како шега сега веќе не е смешно, а дефинициите на зборовите и фразите веќе не се тоа, туку нечие мислење за истите. Точно е дека ваквиот тип речник помага за демократизирање, но како и во други области - децата на демократијата ја јадат од внатре.
