Храбриот Вардар со крената глава се враќа од Барселона

Дербито на колото во салата Блауграна во Барселона започна со 1-минутно молчење во чест на жртвите на терористичкиот напад во Париз синоќа.

 

Барса тргна фуриозно и во првите пет минути делуваше како фудбалската секција на ова спортско друштво. Со трите голови на Тунижанецот Ваел Жалуз, Каталонците брзо поведоа со 5-1 по што реагираше тренерот на Вардар, Гонзалес и повика тајм-аут.

 

Со погодоците на Горбок и Карачиќ, Вардарци некако се разбудија после почетниот шок и во 13. минута семафорот покажуваше гол предност за Шпанците (9-8). Доволна причина околу 100 Комити да се распеат и да ги надвикаат 5.000-те домашни навивачи. Навивачите на Вардар на овој меч допатуваа со автобус.

 

Капитенот на Македонија и најдобриот стрелец на Барселона во Лигата на шампионите, Кире Лазаров имаше невообичаени 0/5 со промашениот пенал кој Штербик му го одбрани на средината од првиот дел. Неефикасноста на Кире ја надоместуваа Раул Ентрериос и Тунижанецот Жалуз кој после 14 минути имаше неверојатни 6 од 6.

Штербик не бранеше од игра, но фати два седмерци (на Лазаров и Јиха) и му овозможи на неговиот состав да го оддржува резултатскиот приклучок и негативата од два гола. Од друга страна, неверојаниот репрезентативец на Тунис Ваел Жалуз погоди седум голови од седум удари и беше најзаслужен за тоа највисоките 4 предност на Барса на пет минути пред крајот на првиот дел.

 

Феноменалниот Жалуз постигна гол од фаулот за домашните во последната секунда преку целиот жив ѕид на Вардар и ги постави конечните на полувреме 16-13. 

Вардар сезонава игра атомски ракомет. Црвено-црните тоа го докажаа на почетокот на второто полувреме кога со неверојатна серија од 4-0 за 6 минути поведоа 16-17. Тоа беше прво водство за Скопјани и тоа со играч помалку им го донесе Сергеј Горбок во 34. минута. Лазаров и седми пат беше непрецизен пет минути подоцна кога Вардар имаше 20-19.

 

Жалуз беше нерешлива енигма и со својот 12-ти гол (10 даде вкупно на претходните четири меча) се обидуваше резултатски да ја одвои Барселона, но Матјаж Брумен, Тоскиќ и Горбок на другата страна не дозволуваа пад на концентрацијата на Вардарци. 

Круцијален момент од мечот беше промашувањето на Тимур Дибиров во 28. минута кога во брза контра Сипшак го постигна својот трет гол и Барса поведе со три разлика 31:28. До крајот Вардар преку Горбок ги постави конечните 31:30.

 

Жалус беше прв стрелец на мечот со 12 голови, а Перез Варгас запиша 12 одбрани. Голем удел во победата на Барса имаа Ентрериос со пет голови и Сипшак со четири. Кај Вардарци, Сергеј Горбок најефикасен со девет погодоци, Тоскиќ додаде четири, а Матјаж Брумен три. Штербик имаше 13 одбрани (2 пенали).

 

Следната недела, Барселона ќе гостува во Скопје на 22. ноември за кога се очекува пеколна атмосфера во СЦ Јане Сандански.