Червар викна некои нови клинци за баражот

Денешниот поширок список на кандидати за настап во решавачките средби за пласман на Мундијалот во Франција го озчани и стартот на работа на Лино Червар. Хрватот се одлучи за 28 ракометари, а како и вообичаено на ваквите списоци нема некои драстични измени и големи изненадувања. Тоа е воглавно најдоброто што Македонија го има.

 

Дебитанти се Ивица Лазаревски (25), Борче Соколов (29), Мартин Томовски (18) и Бобан Блажевски (25) и тие за првпат добиваат репрезентативен статус. Мало изненадување е што на списокот го нема голманот на Металург, Даниел Дупјачанец, а на негово место е неговиот конкурент од Металург, 18-годишниот Томовски кој е светла иднина на мак ракометот. Повикан е и 22-годишниот Мартин Манасков, најдобриот младински репрезентативец.

 

Червар смета на овие ракометари, но набрзо ќе го скрати списокот и ќе ги одбере оние кои ќе ѝ се спротистават на Чешка во Злин на 11 јуни, а потоа на 15-ти јуни ќе ја пречека истата селекција во Скопје. Победникот од двомечот ќе патува на Светското во Франција идната година.

 

Двомечот веројатно ќе значи и крај на репрезентативната кариера на ветераните Миркуловски и Наумче Мојсовски кои најавија повлекување од националниот дрес.