Некој им светеше на Германците со ласер, ФФМ го чека казна

Најпознатиот германски медиум Bild пишува дека во Скопје бил исвиркан почетокот на германската химна и дека на репрезентативците на Германија неколку пати им било светено во лице и очи со ласер.

Фудбалската федерација на Македонија наскоро ќе ја дознае казната, веројатно парична, поради недоличното однесување на дел од публиката на мечот со Германија во Скопје.

ФФМ и порано во неколку наврати плаќаше казни поради неодговорни поединци, а сега се соочува со казна поради тоа што со ласер им било светено на противничките играчи.

Ова не е првпат ласери да бидат проблем на фудбалски натпревари, а оваа мала направа се користи и на кошаркарските натпревари. Неодамна на Европското првенство во фудбал голманот на Данска Каспер Шмајхел тотално беше заслепен при светење со ласер додека бранеше пенал на мечот со домаќинот Англија.

Германските корисници на Твитер го осудуваа овој чин, а меѓу нив имаше и некој што се пошегува со: „Кој уште користи ласер?! Па тој сигурно уште има и Нокија“.