Двомечот на Македонија против Литванија 21-24 ноември, во квалификациската група Х за ЕП 2025, не е баш благонаклонет ако се погледнат термините или поточно местото на одигрување на вториот меч.
Кошаркарите вчера вечер го завршија мечот околу 20:00 часот и веќе во 2 по полноќ требале да бидат на аеродром.
Ако се земе предвид дека после тоа им биле потребни туш, вечера и спласнување на адреналинот, немало време ни да легнат. Распоредот за во Литванија оди вака:
- Собир на репрезентацијата во 2:00 часот по полноќ на аеродромот во Скопје.
- Лет за Виена во 4:30 изутринава, пристигнување околу 6 часот.
- Лет од Виена за Вилнус во 10:00, пристигнување околу 13:00 часот.
- Автобуски превоз од Вилнус до Клајпеда, каде ќе се игра мечот, инаку оддалечени 300 км, за што се потребни уште околу 4-5 часа, што значи кошаркарите ќе стасаат приквречер околу 18:00 часот.
- За вечерта е закажан полесен тренинг.
- Следниот ден, во сабота планирано е да се тренира во 13:00 часот.
- Во недела, на денот на натпреварот имаат тренинг од 10:30, а мечот се игра во 18:30.
- Враќањето е во понеделник, повторно со автобус и потоа со два лета преку Вилнус и Франкфурт.
Ако тргнале во 01:00 накај аеродромот во Скопје или 5 часа после завршување на мечот, а во Клајпеда стигнале во 18:00, значи се сместиле после патување и чекање по аеродроми од вкупно 17 часа.
Клајпеда е најголемо пристаниште во Литванија и трет најголем град во Литванија кој гледа према Балтичкото Море.
Мечот се игра во арената Швитурио, која за кошаркарски натпревари има капацитет од 6.200 седишта. Именувана е по нејзиниот спонзор, пиварницата „Швитурис“.
За време на Евробаскетот 2011 таму се играа натпревари од Д групата, а ние го шокиравме домаќинот Литванија во арената Жалгирис во градот Каунас, по што стигнавме до полуфинале.
Добра вест за реваншот против Литванија е што во состав ќе ги имаме Нено Димитријевиќ кој и покрај малата минутажа, синоќа одигра одличен меч против Макаби Тел Авив, како и Ти Џеј Шортс кој на гостувањето против Анадолу Ефес беше фантастичен со 21 поен и 10 асистенции.
Македонија сè уште е во игра за првите две места кои водат на ЕП 2025 во Кипар, Финска, Полска и Летонија, закажано за 27 август - 14 септември 2025-та.
