Порази кои уште болат во Торино. Во 1997 година против Борусија Дортмунд, во 1998 против Реал Мадрид, во 2003 против Милан и во 2015 против Барселона во Берлин.
Поразот против Германците Јуве го одмазди, а три пати му се одмаздуваше и на Реал Мадрид за голот на Мијатовиќ во Амстердам. По големото финале против Милан, Бјанконерите не се сретнаа во Европа со Росонерите, а вечерва имаат шанса да и вратат на Барса за поразот во големото финале во Берлин пред 2 години.
ЈУВЕНТУС - БОРУСИЈА ДОРТМУНД Осминафинале на ЛШ 2014/2015
По неверојатниот и за многу неочекуван пораз во финалето на ЛШ 1997, Јувентус мораше да чека 18 години за да и се „освети“ на Борусија. „Старата дама“ и Германците се сретнаа во 1/8 финалето на ЛШ во 2015-та. Првиот меч во Торино Јуве го доби 2-1 а тогаш Тевез и Мората беа стрелци. Марко Ројс успеа да ја одржи неизвесноста пред реваншот во Германија каде Јуве сепак одржа монолог.
Ретко кој навивач на Јуве беше сигурен во тоа што ќе следува. Италијанскиот шампион на 18. март 2015 одигра совшрен меч и на „Вестфален“ славеше со 0:3 со двата гола на Тевез и еден на Мората.
РЕАЛ МАДРИД - ЈУВЕНТУС Полуфинале на Лига на шампиони 2002/03
Стигнуваме до Реал кој во 1998 година го победи Јуве на Амстердам Арена. По големото разочарување, во 2003-та Бјанконерите добија шанса за одмазда, ги елиминираа „Лос Бланкос“ од ЛШ и стигнаа до големото финале во Манчестер.
На првиот дуел од двомечот, на „Бернабеу“ Реал Мадрид победи 2-1. Резултатот го отвори Роналдо, Роберто Карлос со препознатлива бомба зголеми на 2:0 а Давид Трезеге намали на 2:1 пред реваншот.
Реваншот на полуфиналето против Реал беше можеби најдобриот меч во клупската историја на Јувентус. Црно-белите ги размонтираа Фиго, Зидан, Карлос, Роналдо и Касиљас со 3-1 со головите на Дел Пјеро, Трезеге и Недвед.
На тој 14. мај 2003 Павел Недвед го одигра најдобриот меч во својата кариера. Го постигна третиот гол, а во финишот без потреба доби жолт картон којшто го спречи да игра финале против Милан.
РЕАЛ МАДРИД - ЈУВЕНТУС Осминафинале на ЛШ 2004/05
Како да не ги задоволи една одмазда, па после две години Јувентус одново го елиминираше Реал Мадрид, овојпат во осминафиналето. На Бернабеу Реал победи со 1-0 со голот на Иван Елгера, а Јуве на „Деле Алпи“ одигра уште една магична партија. Давид Трезеге со полу-ножички го отвори резултатот, а Уругваецот Марсело Залаета го однесе Јувентус во следната фаза.
ЈУВЕНТУС - РЕАЛ МАДРИД Полуфинале на ЛШ 2014-2015
Јуве и Реал Мадрид одиграа уште еден сјаен двомеч на кој Торинезите и дефинитивно го преболеа поразот од Амстердам. Првиот меч во Торино го отвори Алваро Мората а по израмнувањето од Кристијано Роналдо, „Апаче Тевез“ од пенал ги постави конечните 2:1.
Во реваншот на „Снатијаго Бернабеу“ Кристијано Роналдо го отвори резултатот, а Мората израмни на стадионот на кој порасна и на кој и денес игра. „Зебрите“ заслужено влегоа во големото финале против Барселона во Берлин.
Таму, во Берлин на 6. јуни 2015-та Јувентус изгуби 3:1 од Барселона која што вечерва доаѓа во Торино на првиот дуел од осминафинале во Лига на шампиони.
