Неочекувано Реал Мадрид се реши на ваков чекор иако извесно време се шпекулираше дека клупата на човекот кој направи чудо со Баер Леверкузен не му е сигурна.
Чаби Алонсо потпиша договор со Реал на почетокот на летото 2025 и му важеше до 30-ти јуни 2028.
Реал Мадрид игра добра сезона, втор е во моментов во Ла Лига каде има 45 бода после 19 кола и заостанува зад Барселона само четири бода. Во Лига на шампиони обезбедија директен пласман во осминафинале.
Но Чаби очигледно не го издржа притисокот и шпански АС пишува дека тој и самиот решил да замине. Негов наследник ќе биде Алваро Арбелоа, некогашен соиграч на Чаби Алонсо во Ливерпул и репрезентацијата на Шпанија.
Арбелоа нема искуство како тренер на професионално ниво и ќе го води Реал најверојатно привремено до крајот на сезоната. Навивачите на „кралскиот клуб“ се исто шокирани од одлуката на управата иако се свесни дека Чаби веројатно ја изгубил соблекувалната и довербата на некои од главните носители на играта.
ЧАБИ САКАЛ ДА ГО СМЕНИ РЕАЛ И ЗАТОА Е „КАЗНЕТ“
Чаби Алонсо дојде во Реал Мадрид со амбициозна цел да го смени системот на игра и методологијата на клубот но се соочил со спротивставеност од играчите навикнати на импровизација и слобода.
Неговите идеи не биле поддржани ни од соблекувалната, ниту од управата на чело со Флорентино Перез кој не му даде јавна поддршка на тренерот.
Конфликтот меѓу него, играчите и управата нараснале за време на Светското клупско првенство и скандалот кога го извади Винисиус од едно претходно Ел Класико пред време.
Под постојани ултиматуми, рокови и шпекулации за отказ, Алонсо бил принуден да се откаже од своите методи и преминал во практично преживување на клупата.
Тој останал изолиран: немал контрола над играчите и заштита од клубот, станал права фигура за секоја вина.
