По ЕП 1980, одиме со случувањата од Европското во Франција кое се одигра во 7 градови во периодот од 12-ти до 27-ми јуни 84-та. Форматот остана со 8 репрезентации со таа разлика што беше воведено полуфинале, а отфрлен беше мечот за трето место.
Франција се падна во силна група со Белгија, Данска и Југославија на кои им се закани пред се со силен среден ред составен од Мишел Планити, Ален Жирес, Луис Фернандез и Жан Тигана. Во групата имаше играчи од типот на Енцо Шифо, Нико Клаесен, Михаел Лаудруп, Алан Симонсен (најдобар играч во Европа во 1997-ма) Франк Арнесен, Мортен Олсен, Драган Стојковиќ и Златко Вујовиќ.
На првиот меч домаќините отворија со победа против Данска со првиот гол на Платини. Средбата мина и со еден несреќен момент за Симонсен кој пред паузата ја скрши ногата. На другиот меч Белгија – Југославија 2:0.
Второто коло донесе поголема возбуда и вкупно 10 гола на двете средби. 51.000 домашни навивачи уживаа во Нант додека Франција го полнеше голот на Белгија. 5:0 беше конечниот резултат и хет-трик за Платини. Данска со идентичен резултат ја декласираше Југославија.
Во третото коло интересно повторно беа идентични резултатите. Данска – Белгија 3:2, Франција – Југославија 3:2 и нов хет-трик на Платини. Французите со 3 од 3 и гол разлика 9:2 во финале се сретнаа со Шпанија која беше прва во групата 2 со ист број на бодови со Португалија, но со подобра гол разлика. На трето и четврто место завршија и Западна Германија и Романија.
Полуфиналето меѓу Шпанија и Данска заврши 5:4 за Шпанците на пенали. На другото полуфинале Французите беа во водство 50 минути, но во 74-та Руи Жорадо израмни за продолженија на мечот. Португалија во 98-ма направи пресврт, но драмата и припадна на домаќинот кој најпрво преку стрелецот на првиот гол Жан Франсоа Домерг израмни на 2:2 во 114-та, а во 119-та победата ја донесе кој друг ако не Платини.
Деветтиот гол на Платини падна во финалето против Шпанија од слободен удар, по што Бруно Белон ги постави конечни 2:0 за прва Европска титула на Франција. Втората ја освоија во 2000-та.
