Групата Е дефинитивно е најзабавна на Мундијалот во Катар.
Во текот на 90 и кусур минути фудбал сите 4 репрезентации беа со карта за осминафинале во рака. На крајот билетите ги чекираа Шпанија и Јапонија.
Второ Светско првенство по ред, четирикратниот светски првак Германија не успева да ја помине групата на еден Мундијал, откако и во Русија 2018 испаднаа, тогаш како актуелен светски првак од 2014 година.
Во 1/8 финале Шпанија ќе оди на Мароко а Јапонците на Хрватска.
ШПАНИЈА - ЈАПОНИЈА 1:2 (1:0)
Откако Јапонија во 1. коло од оваа група направи чудо и ја урна Германија после пресврт 1:2, вечерва „самураите“ исто после голем пресврт ја свиткаа и силната Шпанија.
„Црвената фурија“ тргна во свој стил, офанзивно, со голем посед и контрола на топка. Нападите со гол ги круниса Алваро Мората во 11' минута кога Шпанија поведе.
И со тој резултат се замина на полувреме.
Исто како на средбата со Германија, јапонскиот селектор Хаџиме Моријасу реши да направи две измени на самиот почеток на вториот дел. Влегоа Доан и Митома, а токму првиов донесе израмнување во 48' минута со прекрасен гол:
Лудата радост и еуфоријата ги однесе Јапонците до нов гол и водство само две минути подоцна, во 50' минута. Сензационален пресврт против големиот ривал. Творец на пресвртот Танака за 1-2 по нова неспретна реакција на шпанскиот голман Унаи Симон.
Важно е да се напомене и дека за вториот гол на Јапонците топката во акцијата речиси да излезе во гол-аут со цел обем, иако технологиите покажуваат дека била макар милиметар на гол линијата, односно во важечка игра:
Јапонците со оваа победа на крајот се први на табела со 6 бода и заслужено одат како лидери во осминафинале. Шпанија освои 4 бода и заврши како втора на табела а исто бодови имаше и Германија на трето место но со далеку послаба гол разлика.
КОСТАРИКА - ГЕРМАНИЈА 2:4 (0:1)
На Германците на крајот не им беше доволен ни триумф од 4:2 на храбрите Костариканци.
Германците исто како Шпанија, поведоа рано. Во 10' минута Серж Гнабри ги опушти соиграчите со гол за 0-1. И со тој резултат Костарика и Германија играа до крајот од првиот дел.
Во второ полувреме Костарика израмнува на 1:1 преку Теједа во 58' минута, само неколку минути откако Јапонија направи целосен пресврт.
Костариканците тргнаа по тој луд пат на Јапонците и со голот на Варгас во 70-та минута направија светски потрес. 1-2, резултат кој во еден момент ги носеше во осминафинале.
Но фаворитот на овој меч израмни брзо преку нововлезениот Кај Хаверц во 73' минута а шпицот на Челси донесе и 2-3 во 85' минута.
Пировата победа во 89' минута ја запечати центарфорот Фуклруг. 2-4, три бода но залудни за Германија која поради послаба гол разлика и го препушти на Шпанија второто место и заминува дома во рана фаза.
