Италија ја разби Турција на отворање на Евро 2020

Фудбалската репрезентација на Италија со 3:0 ја совлада Турција во првиот меч од Европското првенство кое свечено се отвори во Рим.

Свечената церемонија на отворањето на Европско првенство 2020 беше во знакот на 24 селекции учеснички на континенталниот турнир. Стартот на најголемиот настан во светот летово го најави легендарниот маестро Андреа Бочели со хитот „Несун дормa“ на стадионот „Олимпико“ во Рим.

Италијанците ја продолжија неверојатната серија од 28 меча без пораз која што ја почнаа уште во есента 2018-та. Италија нема пораз ниту на официјални ниту на пријателски натпревари.

Серијата трае уште од 10 септември 2018-та кога последен пат изгубија, 0-1 од Португаија. Фрапантно делува фактот дека Италија нема ниту примено гол на последните 9 меча по ред!

Последен пат Италија била рекордна во далечните 1930-ти години кога имале серија од 39 меча без пораз.

Притоа Кјелини, Имобиле, Кјеза, Инсиње и екипата имаат 23 победи и 5 нерешени средби со невозможна гол разлика 77:7. Триумфот против селекцијата на Шенол Ѓунеш им е деветта победа по ред после две ремија.

EURO 2020 Opening ceremony at the Olimpico in Rome! 😍#EURO2020 pic.twitter.com/ADcB2yZZIE
— UEFA EURO 2020 (@EURO2020) June 11, 2021

Веднаш по отворањето Италијанците тргнаа по целиот плен, пред свои но и пред турски навивачи на најубавиот стадион во земјата.

Италија под водство на селекторот Роберто Манчини заслужено ја прослави деветтата победа по ред и тоа без примен погодок.

Аѕурите во текот на целиот меч со Турција беа многу подобар противник, имаа поголем посед на топка и повеќе од 20 удари кон противничкиот гол.

Но до триумфот номиналниот домаќин стигна дури во вториот дел од мечот. Прво со автогол резултатот го отвори стоперот на Јувентус Мерих Демирал во 53' минута а Турците ги докрајчија Чиро Имобиле (66') и Лоренцо Инсиње (79') со убави погодоци.