Доминантната Шпанија е прв финалист на Евро 2024!

Со прекрасен фудбал, типичен за светска велесила каква што е Шпанија, „црвената фурија“ после Хрватска, Италија и Германија, вечерва ја урна и Франција. Бледиот Мбапе не покажа ништо цело Европско, а Шпанците заслужено одат во големото финале, петто за нив на Европско во историјата.

Полуфинале на ЕП2024:

ШПАНИЈА - ФРАНЦИЈА 2:1 (2:1)

/Ламин Јамал 21', Олмо 25' - Коло Муани 8'/

Французите први поведоа рано, но Шпанија направи експресен пресврт за само пет минути.

Сите три погодоци на мечот паднаа во првиот дел а еден од двата на Шпанија, оној на Ламин Јамал беше можеби најубав на цело Европско. Бисерот на Барселона заслужено на крајот од мечот ја доби наградата за играч на натпреварот.

И покрај тоа што пред стартот на Европското не ја вбројуваа меѓу првите Топ3 кандидати поради шарениот и подмладен состав, Шпанија покажа зошто е повеќекратен европски и светски шампион.

Со младите полетни Ламин Јамал, Нико Вилијамс и Дани Олмо, Шпанците од старт на турнирот играа беспрекорно. Со гол разлика 13:3 стигнаа до големото финале а на патот до таму ги решаваа Хрватска (3:0), Италија (1:0), Албанија (1:0), Грузија (4:1), Германија (2:1) и Франција (2:1).

Шпанија во полуфиналето играше без двајца стандардни фудбалери, Дани Карвахал и Ле Норман во одбраната, но нивните замени достојно ги одменија во битката за финале.

Французите, вицешампиони од последниот Мундијал 2022 беа само бледа сенка од селекцијата која доминираше во светскиот фудбал во изминатите години. До полуфинале стигнаа со два автогола на противниците и еден погодок од пенал на Мбапе.

Селекцијата на малку познатиот селектор Луис де ла Фуенте во полуфиналниот меч играше со најмладиот и најстариот играч во полуфинале на едно Европско. Разликата во години меѓу Ламин Јамал и Хесус Навас е дури 22 години, што е уште еден куриозитет.

Победа на Шпанците им донесе Дани Олмо кој е нивен најефикасен играч на Европското со 3 гола и 2 асистенции досега.

Шпанија сега во финале ќе го чека подобриот од мечот Холандија - Англија (среда 21:00).

9 јули 2024 - 22:48

Штета ако сте пропуштиле

Како ова на сите им беше толку јасно... до вчера?

Јагмата по „бадемово млеко“ ги потепа американските пчели

Сара, батали го!

Глупи едни. Името да го вратите.