Добро е, пантерот на Вардар се исправи на нозе

74 годишниот Мутибариќ пред еден месец имаше мозочен удар и беше во тешка здравствена состојба, а во интервју за Слободен печат изјави дека е неподвижен и дека по 12 дена лежење во болница не знае што понатаму.

„Неподвижен сум, врзан за постела. Не знам како да планирам евентуална рехабилитација, кога има коронавирус на сите страни. Што е подобро, да добијам коронавирус, што би било кобно за мене, или да мирувам вака? Ситуацијата ми е катастрофална. Јас сум оптимист по природа, но доколку ова го пребродам ќе биде чудо. Немоќен сум потполно“.

Проблемот е што со сопругата живеат со една пензија од 13.500 денари, пари со кои не може да си дозволи основни работи, како лекарства и рехабилитација.

Но син му на Муто, Слободан Мутибариќ, исто така поранешен голман на Вардар соопшти на Фејсбук дека татко му е на нозе и му се заблагодари на бизнисменот Труфин Костовски за помошта.

Инаку легендарниот Мутибариќ сè уште го држи рекордот во Македонија од 1004 минути без примен гол, поставен во 1989-та во Вардар за кој има 461 настап. Добитник е на 13-Ноемвриската награда, а четири пати бил и најдобар спортист на Македонија.

Седум години по ред аплицирал за еднократна финансиска помош од Агенцијата за млади и спорт, а по апелот на медиумите, директорот на АМС, Наумче Мојсоски изјави тој ќе добие еднократна помош и дека ќе влезе во системот со цел да се обезбеди трајнo решение за континуирана финансиска поддршка.