Детето што го победи ПСЖ и сега ќе се врати во школо на часови

Мејсон Гринвуд синоќа стана најмладиот дебитант во историјата на ЛШ: Со 17 години и 156 дена влезе во игра кај Манчестер Јунајтед и го сруши рекордот на Жерар Пике (17 година и 310 дена).

Во ситуација кога Оле Гунар Солскјер не можеше да смета на: Пол Погба, Хуан Мата, Марсијал Лингард, Матиќ, Фил Џонс, Ерера, Алексис Санчез, Дармијан и Маркус Рохо - речиси сите до еден првотимци, шанса добија неколку голобради деца од школата на клубот.

На клупата за резерви на „Паркот на принцеви“ беа: Таит Чонг, Гарнер, Гомез и едно дете кое влезе пред крајот од мечот. Се вика Мејсон Гринвуд и уште нема мустаќи колку е млад.

****

Мејсон Гринвуд е роден на 1 октомври 2001 година во Вибсеј, Бредфорд.

Како помал почнал да игра во средниот ред а набрзо го префрлиле во шпицот од нападот. Во сезоната 2017-2018 го префрлиле во тимот до 18 години на Манчестер Јунајтед и постигнал 17 гола на 21 меч.

Практично кога Мејсон Гринвуд се родил, Џиџи Буфон веќе имал 23 настапи за репрезантација на Италија.

Благодарение на тој учинок, во јули минатата година го викнале на пред-сезонската турнеа со првиот тим во САД. Првиот професионален договор го потпишал на 2 октомври 2018.

И ни повеќе ни помалку, дебитираше за првиот тим на најважниот меч во сезоната, против Пари Сен Жермен на реваншот од Лига на шампиони. Влезе во игра во 87 минута место Ешли Јанг кога мечот „се кршеше“ и на крај се „скрши“ во корист на Манчестер.

Инаку Мејсон Гринвуд оди во училиштето Mersey School кое соработува со Манчестер Јунајтед кој ги праќа децата од својата академија на часови таму.

Мејсон во петок треба да се појави на часови кај учителките.