Со новите правила на финансиски фер-плеј, клубовите (со исклучок на трошаџиите како ПСЖ, Монако, Сити, Челси...) се повеќе ќе внимаваат како ги трошат парите и нема да се расфрлаат со пари. Ова посебно важи за трансферите, односно клубовите станаа многу повнимателни при одбирањето и купувањето на нови фудбалери.
Една компанија веќе неколку години им помага на големите клубови да го најдат својот идеален фудбалер, а на помалите клубови им помага да ги промовираат своите таленти и тоа преку видеа.
Тоа е италијанската компанија Wyscout оформена од поранешниот банкар Матео Камподонико кој со свој пријател почнале да снимаат натпревари во 2004-та година. Следната година тој му напишал писмо на Серсе Косми, тогашен менаџер на Џенова и тие почнале да работат за клубот од Серија А, а во 2008-та година формирале и своја компанија чија главна дејност е снабдување на заинтересираните клубови со видео материјал од нивни потенцијални засилувања.
Во овој момент дури 300 професионални клубови, 15 национални федерации и 150 менаџерски агенции од светот се корисници на Wyscout платформата. Гигантите како Барселона, Реал Мадирд, Арсенал, Милан, Борусија Дортмунд... плаќаат и по 10.000 евра за регистрација и користење на нивните услуги.
Компанијата Wyscout сега има 60 вработени кои ги анализираат видео материјалите и ги евидентираат сите потези на играчите како додавања и шутеви кон гол.
Освен платформата, компанијата Wyscout од 2011-та година го организира и познатиот форум на клубови и агенции. Тоа е најголемиот собир во фудбалската индустрија кој се одржува два пати годишно пред почетокот на трансфер пазарот, а последниот таков форум се одржа на 3 и 4 јули на Камп Ноу стадионот во Барселона. Тоа е местото каде претставници на преку 200 клубови и менаџерски агенции ги имаат првите контакти и се започнуваат преговорите за најголемите трансфери. Тоа е иднината на трансфер пазарот.
