За неинформираните, има нешто што се вика трајна шминка, што е всушност тату-техника (да, тетоважа е во прашање) што ти овозможува полни веѓи, поинтензивна боја на усни и туш на очи што трае со години - без да се мачиш. И за разлика од техниките во ’80-ти, во 2020, трајната шминка навистина личи на шминка, а не на ЈНА мастило преку очни капаци.
Да видиме како функционира и дали е болно.
Прво, дали трајната шминка е безбедна?
Може да биде, но сепак има многу фактори што треба да се земат предвид за да се избегнат компликации или инфекции. Убаво истражете го студиото - следете ги на Инстаграм, пишувајте им на клиенти во ДМ, проверете дали имаат лиценца… Сѐ што е битно за безбедност да ви биде штиклирано. Плус, проверете да не имате алергии на бојата.
И на крај, откако ќе се одлучите на овој чекор, морате да се грижите убаво за трајната шминка за време на процесот на заздравување. Пократок е од обична тетоважа затоа што иглата не оди толку длабоко, ама можат да се очекуваат слични „проблеми“: суво, мали рани, лупење…
Колку трае?
Зависи од третманот, може да трае од една до три години. Што значи, не е баш трајна, ама потрајна е од таа дома. А и што знаеш, може ќе се предомислиш за 2-3 години, па ќе сакаш скроз чисто лице. Затоа е добро.
Трајна шминка на усни: Во овој процес, сличен на филери, добивате пополни усни и повеќе боја. Поприродно изгледа од филерите, а можеш да бираш нијанса, па после со игла се вметнува пигментот во усните. Се прави со претходно нанесување анестетик, па не би требало да почувствувате нешто повеќе од повремено боцкање. После една недела осетливост и сувост, имате нова уста.
Траен молив на очи: Мора да е фино чувството да станеш сабајле, со совршено нанесен молив/туш и да не мораш да губиш време на тоа. Башка, секое погледнување во огледало - нашминкана. Лепота. Ако се решите на овој чекор, и ова ќе трае од една до две години, а додека зараснува, гледајте што е можно помалку шминка да ставате и избегнувајте вода на таа област во период од една недела.
Дали боли?
И овде има анестетик. Сепак, не се плашете да си кажете ако заболи.
За тетовирање ББ крема имавме овде.
Цените варираат. Во Америка, во зависност што тетовирате, се движат од 500 до 1500 долари, кај нас, останува да се провери кој, како и за колку пари го прави ова. Имаше реклами во ’90-ти по телевизии и радија, ама пусто, квалитетот на рекламата некако како да одвраќаше луѓе.
Да се надеваме дека денес е поинаку.
