Посветените фанови на Џо Голдберг дочекаа (дел од) четврта сезона. Вториот дел ќе го добијат за еден месец, а во меѓувреме, пред да ја изгледаме цела, можеме да заклучиме дека од првата епизода е јасно дека се бега формулата заљуби се - утепај пола друштво - помогни на немоќно дете - заеби сè - избегај.
Прво, ред е да признаеме дека Пен Беџли не мора веќе да го викаме Ден Хамфри. Уредно се откачи од тоа име после толку посветена работа на комплициран лик како Џо Голдберг. Поточно, сега веќе се работи за професорот Џонатан Мур, новото име на Џо, кое заедно со работна виза и лажни документи го добива за да почне од ново во Лондон и да проба да избега од стариот манијачен живот.
Овој пат баш и не му е така лесно - некој знае кој е и каков е, и да не беше Лав (жена му од трета сезона) запалена (запалена како скара), можевме и да се кладиме дека е таа. Со тоа што, финале уште немало, па не е дека е исклучено дека ќе ја видиме. Лав и онака е меме-фејворит и онака актерката заврши мајсторска работа, може и ќе нè почастат. Реално, ако Џо можеше да си ја лажира смртта и да го снема, зошто да не може тотално нездравата, комплетно (и филмски забавно) пореметена Лав?
Ако ги тргнеш манијачните и психопатски способности на Џо Голдберг, со пола уста признаваш дека се работи за пристојна особа - човекот си чита, сега веќе и си предава на факултет, сака да седи сам, да оценува испити, но неговиот хорор не се ни екстремитети исечени на циркулар, ни подмукло следење луѓе - пеколот му е снобовско, гадно друштво од лондонското високо добро утро, со глава полна проблематични вредности и крв полна дрога и апсинт. Капак на тоа,
(спојлер за прва епизода!)
сите му се сомнителни дека баш меѓу нив е тој што го мести и за ново убиство и што му ги знае старите. Во секој случај, фино е да се види дека нема да мачат со истото, иако за волја на вистината, трета сезона беше поинаква од прва и втора. Еден Ден Браун работи по формула па, пак е бестселер, овде е освежително да се види дека ризикуваат и се исплати.
До сега, супер.
Отсега, да се надеваме. Во меѓувреме, да се потсетиме, дека: Не, не треба да навиваме за Џо Голдберг.
