Збогум Тихо
30 јануари 2026
- На 59 години ненадејно почина Тихомир Јанчовски, поет, преведувач, професор по историја, некогашен колумнист на офф.нет.
- Во неговата библиографија се впишани дваесетина збирки поезија, два романи-дневници, една книга за деца. Особено беше посветен на промовирањето на православното културно наследство, преку преводи и истражувачки дела, како „Монаштвото во Македонија (1944-2007)“. Традиционално на денешен ден, 30 јануари, ја одбележуваше својата слава, св. Антониј.
- Во периодот 2013-2016 имаше своја „бавча“ на офф.нет, „Исповеди“, во која пишуваше за хороскопот, за крадењето и кодошењето, за мекото „л“, за македонцките работи. Раскажуваше како повеќе пати бил на Света Гора, но и дека работел како физикалец, собар, тапкарош и келнер. Тихо живееше, дискутираше и пишуваше со полни гради. Нека му е вечна слава.
- „Патината не е нечистотија, таа е белегот на времето врз душата. Останатите убави нешта кои ни се во согласност со сегашноста што ја живееме. Да не мешате патина и гнасотија, потребно и непотребно. Кој не сака ништо да фрли, кој чува сѐ, има преполн подрум и гаража, и пренатрупани соби дома - тој се плаши од смрт, од умирачка. И сака ништо да не му избега, низ глава ги превртува и спомените, да не ги заборави. Скржавите луѓе се страшливи луѓе, не се сотони. Имале нешто поради што станале скржави. Обично, нешто им фалело како деца, па после стануваат „чувачи“. А на кој му фалело љубов, станува посесивен. Се плаши да не биде оставен. И љубоморните жени и мажи се такви од истата причина. Некој некогаш ги оставил, или тие оставиле некого што ги сакал, и после прават сѐ новиот да не им избега. И го прават најлошото што може. Го бркаат со сите сили од себе. И се чудат зошто истото им се повторува... сѐ додека не разберат, и не се простат со оној со кој се во кавга, така си простуваат и себеси и нему, и можат да продолжат чисти и уредни, во новиот живот, на новиот пат. И ќе си понесат и понекој спомен од старите нешта, од старите „љубови“, но тие тогаш се на вистинскиот друм, со вистински ум, и не се во љубов туку во убов, постојат во убавина.“ (август 2021)
-
Море Тихо,
А да свртевме уште некое фудбалче кај нас во Трендоленд? Да ги посвиревме Џокси и Пепи? Да признававме дека многу им имаме попуштано на кретени? Да разменувавме трикови како се избегнува Скопје додека си во него? Да ти се радував кога ќе ми пишеше дека имаш нова бавча или книга? Да сакаше да ме мириш со кафанџии со кои сум раскинал?Не, а?
Пред иха-ха години ми најави дека со другарка ни Лале сакате да фаќате џенем накај Кападокија, може и Сирија. Сега ни тоа.
Така било тоа? Така било тоа.
Штимај се горе, со тоа демек лутите веѓи, тие што не те знаат, нека ти се плашат малку.
И гушни ја Лале од мене.
Трендо
