- Пакувајќи го во речник на рекетар почетник Таравари деновиве порача дека Албанците при крај се со нервите околу преговорите со ЕУ, па ако таму не мрднат работите „ќе се појават нови идеи за реорганизација на државата.“
- Во интервјуто за ТВ Шења лидерот на идниот владин коалиционен партнер вели: „Може да пораснат фрустрации и кај Албанците и може да се појават нови идеи за реорганизација на државата. Ќе влеземе во зачарен круг од кој нема излез“.
- Таравари, денешната ситуација ја споредува со НАТО самитот во 2008, кога влезот на Македонија во Алијансата беше блокиран од грчко вето заради грчкото инсистирање да го смениме името.
- Во државата што сака да ја распаѓа Таравари до сега го има завршено целото свое образование, работеше како доктор, ја водеше Клиниката за неврологија, беше министер за здравство во владата на Заев, а сега е актуелен градоначалник на Гостивар.
- Повеќе од 56% од вкупниот број жртви во првите 15 месеци од израелските напади во Газа биле деца, жени и стари лица, покажува нова научна студија на медицинското списание Лансет. Ова го негира ставот на Израел дека биле убиени подеднаков број цивили и терористи од Хамас.
- Од вкупно 75.200 лица што загинале како директна последица на израелските напади, 22.800 биле деца, 16.600 биле жени на возраст од 18 до 64 години и 2.870 биле луѓе на возраст над 65 години, покажува обновената анализа на податоци за периодот од почетокот на нападите на 7 октомври 2023 година, па сè до 5 јануари 2025.
- Вкупниот број на убиени Палестинци во овој период, според Лансет, бил за околу 26.000 повисок во споредба со тогашната проценка на локалното Министерство за здравство (49.090).
- До 5 јануари 2025 година имало и 8.540 смртни случаи во Газа индиректно предизвикани од израелските напади – поради глад или повреди и болести што инаку можеле да се санираат или излечат.
- Новата студија објавена во Лансет глобал хелт ја изработил тим составен од економист, демограф, епидемиолог и специјалисти за анкети.
- Ерфорс 1, авионот на претседателот на САД, ќе биде префарбан во нова комбинација на бои во избор на Доналд Трамп – темносина, бела, црвена и златна, потврди Военото вздухопловство. Ќе прилега на малиот модел што Трамп го изложува на работната маса во Овалната соба при средба со странски лидери.
- Боинг веќе почна да модификува два свои авиони 747-800, кои треба да ги заменат двата идентични 747-200 што ги користи претседателот. Секретарот за авијација Трој Мејнк во јуни изјави дека безбедносните модификации би чинеле помалку од 400 милиони долари.
- Трамп уште во својот прв мандат побара да бидат префарбани претседателските авиони, кои уште од времето на Џон Ф. Кенеди се во светлосино-бела комбинација од бои. Трамп побара горната половина да биде бела, а долната темносина, со црвена и златна линија од клунот до опашот, слично на неговиот приватен авион. Ревизија на Воздухопловството оцени дека тоа ќе ја зголеми цената и ќе ја одложи испораката на авионите, па Џо Бајден ја укина одлуката во 2023 година.
- „Сè си има свое време и место. Ќе ги смениме боите. Сакаме моќна сина, а не бебешка сина“, изјави неодамна Трамп.
