- Откако Доналд Трамп го почна својот втор мандат и воведе строги имиграциски политики, Стејт департментот поништил повеќе од 100.000 визи. Ова е зголемување од 150% во однос на 2024 година.
- Поништени се 8.000 визи на студенти и 2.500 специјализирани визи на работници што ги прекршиле законите. „Ќе продолжиме да ги депортираме овие насилници за да ја одржиме Америка безбедна“, соопшти Стејт департментот.
- Четирите водечки причини за поништување на визите се пречекорување на дозволениот престој, возење под дејство на алкохол, напад и кражба.
- „Стејт департментот отвори Центар за континуирана проверка со цел да се обезбеди сите странски државјани на американска почва да ги почитуваат нашите закони. Брзо ќе бидат одземени визите на оние кои претставуваат закана за американските граѓани“, изјави портпаролот на Стејт департментот, Томи Пигот.
- Администрацијата на Трамп ги заостри и критериумите за доделување визи и ги прошири проверките на апликантите. Новата директива до дипломатските претставништва е да бидат внимателни кон сите кандидати кои може да бидат непријателски настроени кон САД и кои имаат историја на политички активизам.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
