Вести › Набрзинка

САД бомбардираа цели на ИСИС во Нигерија

26 декември 2025

Американските сили со проектили истрелани од бродови нападнаа бази на исламистичката група ИСИС во Нигерија, која ја обвинуваат дека напаѓа христијански цивили во северната провинција Сокото. Не се објавени детали за жртви.
Нигериските власти соопштија дека го одобриле нападот „во согласност со меѓународното право“. Размениле разузнавачки информации и се координирале со САД.

Нигерија се бори против повеќе милитантни групи, вклучувајќи најмалку две поврзани со Исламска држава. „Терористичкото насилство во која било форма, без разлика дали е насочено кон христијаните, муслиманите или другите заедници, останува навреда за вредностите на Нигерија и за меѓународниот мир и безбедност“, соопшти Министерството за надворешни работи.
Трамп при крајот на октомври предупреди дека христијаните се соочени со егзистенцијална закана во Нигерија и се закани со воена интервенција ако властите не успеат самите да ги запрат насилствата врз христијанските заедници. Од крајот на ноември американски извидувачки авиони зачестија со надлетувања над Нигерија.

САД пред една недела извршија напади врз групата ИСИС во Сирија, како одмазда за терористичкиот напад во Палмира, во кој беа убиени двајца Американци.

извор

Имигрантскиот агент кој ја уби онаа жена сега е милионер

16 јануари 2026

Агентот на Службата за имиграција и царина (ICE) кој смртно ја застрела 37-годишната Рене Никол Гуд во Минеаполис стана милионер благодарејќи на лавината донации на негова сметка.
43 годишниот Џонатан Рос собрал 747.000 долари на GoFundMe и 279.000 долари на GiveSendGo.
Иако повеќето од над 21.000 донации се дадени анонимно, има и познати: милијардерот Бил Акман - поддржувач на Трамп - кој за Рос дал 10.000 долари.
ФБИ спроведува истрага за фаталното пукање врз Гуд а извори блиски до истрагата сугерираат дека „сè помала е веројатноста“ Рос да се соочи со кривични обвиненија.
Рене Гуд беше убиена откако не ја послуша наредбата на агентите на ICE да излезе од кола и почна да вози. Јавноста е поделена дали агентот пукаше во самоодбрана или убиството беше непотребно.
Нејзиното семејсто ја ангажираше фирмата која го застапуваше семејството на Џорџ Флојд, да спроведе граѓанска истрага за смртоносното пукање. Фирмата Романучи & Бладин помогна да се издејствува спогодба од 27 милиони долари за семејството на Флојд.

извор

Нобеловиот медал заврши кај Трамп

16 јануари 2026

На американскиот претседател Доналд Трамп лани му избега нобеловата награда за мир, но барем го доби златниот медал. Лично му го подари добитничката, венецуелската опозиционерка Марија Корина Мачадо, како „признание за неговата единствена посветеност кон нашата слобода“.
Трамп лани упорно и агресивно лобираше да ја добие Нобеловата награда, која досега им беше доделена на неколкумина американски претседатели, вклучувајќи го и Барак Обама. Најави дека ќе го задржи врамениот медал што го доби на подарок. „Марија ми ја додели Нобеловата награда за мир за работата што ја направив. Прекрасен гест на меѓусебно почитување“, порача Трамп.
Нобеловиот комитет во Осло нема ништо против подарокот и објасни: „Медалот може да ги промени сопствениците, но титулата лауреат не може“.
И покрај љубезните гестови и комплименти, Трамп не верува дека Мачадо има доволно голема поддршка во Венецуела за да биде инсталирана на власт, на местото на претседателот Николас Мадуро, кого САД неодамна го грабнаа од палатата во Каракас. Наместо Мачадо, Трамп ја поддржува поранешната потпретседателка Делси Родригез, која по положувањето заклетва на 5 јануари покажа волја за соработка со САД и е во „постојана комуникација“ со државниот секретар Марко Рубио.
„Не е променет ставот на претседателот за способноста на Мачадо да ја води земјата... Неговата проценка е заснована на реалноста на теренот“, изјави портпаролката на Белата куќа, Керолин Ливит.

извор