- Руската Дума пред неколку дена донесе закон со кој се овластува Сбербанк, централната банка и другите финансиски институции да инсталираат системи за електронско војување и да ги вооружаат ои обучат вработените за соборување украински беспилотни летала што им се закануваат на нивните објекти.
- Дека постои таква потреба покажа и една крстосувачка ракета „Сторм Шедоу“ од британско производство која истиот ден ја погоди канцеларијата на руската централна банка во Севастопол, Крим.
- Руските банки ќе можат да инсталираат свои системи за одбрана од беспилотни летала, да ги блокираат сигналите и да уништуваат беспилотни летала без да чекаат овластување од безбедносните служби.
- Законот доаѓа во време кога Украина сè поефикасно користи дронови за напади на цели длабоко во руската територија.
- Доналд Трамп вчера го претстави подарокот од Катар вреден 400 милиони долари – новиот и луксузен авион за службената флота на претседателот на САД.
- „Ова е најлуксузниот авион во светот. Изграден е на ниво кое веројатно никогаш повеќе нема да се види“, изјави Трамп откако се прошета низ авионот.
- Новиот Ер форс 1 е многу поголем од претходните. Во основа, тој е „боинг 747-8“ конструиран за катарското кралско семејство, преуреден за потребите на претседателот на САД. Ентериерот изобилува со кожни гарнитури и златни декорации, патриотски слики и огромни екрани.
- Пред да може претседателот да го користи за службени патувања, авионот треба да помине „завршен испит“ за проверка на обуката на пилотите и на ефикасноста на системите.
- Пентагон во октомври изнајми од Луфтханза авион „Атлас Ер 747-8“, а потоа купи друг само за да може да се обучат пилотите и екипажот.
- Претседателот Карол Навроцки му го одзеде највисоко полско одликување на Володимир Зеленски поради тоа што именуваше армиска формација Херои на УПА - според единицата одговорна за масакри врз Полјаци за време на Втората светска војна.
- Варшава тврди дека Украинската бунтовничка армија (УПА) била вклучена во масакрите во Волинија од 1943 до 1945 година, во која биле убиени 100.000 Полјаци. Украинските националисти ги слават борците од УПА како херои на борбата против нацистичките сили и Црвената армија.
- „За огромното мнозинство од полското општество, УПА останува, пред сè, формација одговорна за бруталните злосторства извршени врз граѓаните на Полска за време на Втората светска војна... Оваа одлука не е насочена против украинскиот народ. Таа не означува промена во стратешката насока на полската безбедносна политика“, објасни Навроцки.
- Во знак на протест поради одлуката на Зеленски, полскиот нобеловец Лех Валенса изјави дека повеќе нема да носи значка со украинско знаме.
- Поранешниот полски претседател Анджеј Дуда го одликуваше Зеленски со Орденот на Белиот орел во 2023 година, како „признание за неговиот придонес во билатералните односи, демократијата, мирот и безбедноста во Европа“.
