- Рене Реџепи го напушти престижниот ресторан Нома, по лавината обвинувања од поранешни вработени дека ги малтретирал, физички ги напаѓал и создавал токсична работна средина во кујната.
- „Извинувањето не е доволно. Ја преземам одговорноста за моите постапки... По повеќе од две децении градење и водење на овој ресторан, решив да се повлечам и да им дозволам на нашите извонредни лидери сега да го водат во неговото следно поглавје, порача готвачот со македонско потекло.
- Токму вчера Нома требаше да отвори 16-неделен поп-ап ресторан во Лос Анџелес, со мени од 1.500 долари по гостин. Резервациите биле распродадени за само три минути. Но, по низата обвинувања до Реџепи за злоупотреба, повеќето корпоративни спонзори ја откажаа поддршката.
- Реџепи го основаше ресторанот Нома во Копенхаген во 2003 година и беше главен готвач. Ресторанот има три Мишелин ѕвездички и пет титули најдобар ресторан во светот.
- Уставниот суд на Албанија пресуди дека едногодишната забрана на ТикТок од страна на владата е неуставна и ја нарушувала загарантираните слобода на печатот и слобода на изразување.
- „Владата не ги испитала доволно последиците од спроведувањето на забраната и не докажала убедливо дека општото блокирање на платформата претставува единствено ефикасно и неопходно средство за постигнување на предвидената цел“, се наведува во пресудата.
- Владата на Еди Рама лани го забрани ТикТок по трагичната смрт на тинејџер кој бил малтретиран преку платформата. Забраната за пристап заврши на 5 февруари, откако платформата во кинеска сопственост вградила нови „безбедносни механизми“.
- Блокадата на Тикток ја оспорија Здружението на новинари на Албанија и Балканската мрежа за истражувачко новинарство. Опозициските партии ја обвинија владата дека се обидува да ги замолчи со тоа што ја забрани платформата неколку недели пред парламентарните избори минатата година, што владата го негира.
- Пратениците на Чешката Република го одобрија буџетот за 2026 година со кој се издвојуваат 7,4 милијарди долари за Министерството за одбрана, или нешто повеќе од 1,7% од БДП, што е под минималниот таргет на НАТО од 2%.
- Премиерот Андреј Бабија кажа дека ваквата распределба е максимумот и дека неговата влада дава приоритет на „здравјето на нашите граѓани“ пред повисоките трошоци за одбрана.
- Американскиот амбасадор Николас Мерик минатата недела предупреди дека Чешка ризикува да стане една од најниските плаќачи во Алијансата.
- Под притисок на Доналд Трамп, НАТО очекува до 2035 година членките да издвојуваат 3,5% од буџетот за основни воени потреби и уште 1,5% за други инвестиции поврзани со одбраната.
- Бабиш се врати на власт откако неговото движење АНО (или ДА), постигна голема победа на изборите во октомври, по што формираше владина коалиција со две помали политички групи чија агенда е олабавување на поддршката за Украина и отфрлање на некои клучни политики на Европската Унија.
