Вести › Набрзинка

Патување во ЕУ без ЕТИАС до крајот на 2026 година

28 март 2025

Европската Унија го одложи за до последниот квартал од 2026 година воведувањето на Европскиот систем за информации и овластување за патување (ETIAS).
Овој систем ги обврзува граѓаните од 59 земји што се ослободени од визи, како што е Македонија, да добијат одобрение пред да патуваат во Шенген зоната.
Граѓаните ќе мора да пополнат онлајн апликација и да платат такса од 7 евра за дозвола со важност од три години или до истекот на пасошот. Со такво одобрение може слободно да се влезе повеќе пати во која било од 30-те земји од Шенген-зоната.
Се препорачува рано аплицирање, бидејќи процесирањето може да трае од неколку минути до 30 дена.
Шест месеци по ETIAS ќе, биде воведен и системот за влез и излез ЕЕС, кој треба да ја дигитализира регистрацијата на пасошите на граничните премини. Ќе се собираат биометриски податоци, како фотографија на лицето и отпечатоци од прсти, заради полесно следење на движењето на патниците и спречување идентитетски измами.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор