- Парламентот на Норвешка од денеска почнува јавна истрага за врските на дипломати и политичари со осудениот американски злосторник Џефри Епстин, кој почина во затвор во Њујорк. Во милионите документи од досието на Епстин, објавени во јануари, беа откриени неговите врски со норвешки политичари, дипломати, влијателни богаташи и членови на кралското семејство.
- Парламентарниот комитет повика на сослушување 11 сегашни и поранешни министри, вклучувајќи го и актуелниот премиер Јонас Гар Стере, кој беше министер за надворешни работи од 2005 до 2012 година. Ќе сведочи и Берге Бренде, кој поради скандалот поднесе оставка од функцијата директор на Светскиот економски форум.
- Поранешниот министер за развој Ерик Солхајм, кој треба да биде сослушан денеска, изјави дека истрагата е „претерана реакција што ќе ја задуши надворешната служба и ќе им наштети на националните интереси“.
- На сослушување не се повикани политичарите за кои полицијата веќе отвори истрага поради обвиненија за корупција - поранешниот премиер Торбјорн Јагланд, министерот Терје Род-Ларсен и дипломатката Мона Јул. Нема да сведочи ниту кралицата Мете-Марит, сопруга на кралот Хакон, која јавно се извини за своето пријателство со Епстин.
- „Владата мора да објасни што прави за да ја врати довербата во надворешната служба“, изјави Јонас Андерсен Сајед, водач на сослушувањето во парламентарниот Комитет за надзор и уставни прашања.
- Џенсен Хуанг поднесе оставка од функцијата извршен директор на Nvidia, откако призна дека имал љубовни афери со осомничена кинеска шпионка и со соработничка од фирмата.
- Управниот одбор на Nvidia соопшти дека нема да има прекини во развојните планови и обврските кон клиентите. За привремен управник на компанијата е назначена Колет Крес, долгогодишна финансиска директорка.
- Аналитичари од Вол стрит предупредуваат дека заминувањето на директорот на најголемиот производител на чипови и воедно највредната компанија во светот може да биде првиот чин од очекуваното пукање на финансискиот балон надуен околу технологијата за вештачка интелигенција.
- По објавувањето на аферата на Хуанг со кинеската шпионка, Nvidia за само две недели изгуби пазарна капитализација во вредност од околу 1.400 милијарди долари.
- „Без Хуанг на челото, вредноста на Nvidia е помала за 25%“, изјави Ден Ајвс, еден од највлијателните аналитичари на Вол стрит.
- Поради својата големина, падот на Nvidia се одразува на сите главни индексни фондови, што има огромни последици на сите Американци што штедат преку инвестиции на берзите.
- Прекуокеанскиот брод „SS United States“, своевремено најбрзиот патнички брод што го препловил Атлантикот, контролирано е спуштен на дното на Мексиканскиот Залив.
- Бродот поголем од „Титаник“, кој 800 пати го преминал океанот, ќе биде најголемиот вештачки гребен во светот. Целта е да се создаде живеалиште за туни, марлини и сабјарки и да се привлечат повеќе нуркачи и љубители на риболов.
- Потопувањето траело 5 часа, значително подолго од очекуваните 45 минути. Со вода биле наполнети сите 128 резервоари за гориво и мазива, за да се спушти рамномерно на морското дно, на длабочина од 55 метри.
- Проектот да се спречи бродот да заврши како старо железо чинеше 13,5 милиони долари.
- „SS United States“ долг 302 метри беше технолошко чудо на бродоградителите од Вирџинија. На првата пловидба во 1952 година, го поминал Атлантикот со просечна брзина од 41 милја на час (66 км/ч), со што за 4,5 милји на час го надминал рекордот поставен од британскиот „RMS Queen Mary“ во 1938 година.
- Двата црвено-бело-сини оџаци на „SS United States“ високи 20 метри лани беа внимателно отстранети и ќе бидат изложени во нов музеј на копно.
