- Парламентот на Норвешка од денеска почнува јавна истрага за врските на дипломати и политичари со осудениот американски злосторник Џефри Епстин, кој почина во затвор во Њујорк. Во милионите документи од досието на Епстин, објавени во јануари, беа откриени неговите врски со норвешки политичари, дипломати, влијателни богаташи и членови на кралското семејство.
- Парламентарниот комитет повика на сослушување 11 сегашни и поранешни министри, вклучувајќи го и актуелниот премиер Јонас Гар Стере, кој беше министер за надворешни работи од 2005 до 2012 година. Ќе сведочи и Берге Бренде, кој поради скандалот поднесе оставка од функцијата директор на Светскиот економски форум.
- Поранешниот министер за развој Ерик Солхајм, кој треба да биде сослушан денеска, изјави дека истрагата е „претерана реакција што ќе ја задуши надворешната служба и ќе им наштети на националните интереси“.
- На сослушување не се повикани политичарите за кои полицијата веќе отвори истрага поради обвиненија за корупција - поранешниот премиер Торбјорн Јагланд, министерот Терје Род-Ларсен и дипломатката Мона Јул. Нема да сведочи ниту кралицата Мете-Марит, сопруга на кралот Хакон, која јавно се извини за своето пријателство со Епстин.
- „Владата мора да објасни што прави за да ја врати довербата во надворешната служба“, изјави Јонас Андерсен Сајед, водач на сослушувањето во парламентарниот Комитет за надзор и уставни прашања.
- Италијанската влада ќе прераспореди дополнителни 500 војници за да го „одбранат Милано“ по дводневните немири во кои демонстрантите се судрија со полицијата, ограбуваа продавници и уништуваа имоти, изјави вицепремиерот Матео Салвини.
- Распоредувањето на војниците ќе биде дел од пакетот нови безбедносни мерки кој го носи владата во време кога продавниците во центарот на Милано рано ги затвораат вратите и ги покриваат прозорците со штици.
- За време на викендот биле приведени 271 млад човек во Милано а на немирите им претходеа судири во други градови во северна Италија, вклучувајќи ги Болоња, Бреша, Бергамо и Торино.
- Причини за протестите се зголемените трошоци на живот, нефункционирање на институциите и неквалитетот на јавните сервиси.
- Огромно мнозинство на граѓаните на Алберта се изјаснија нивната провинција да остане во Канада и да не распишува обврзувачки референдум за прогласување независност.
- Нецелосните резултати од вчерашниот необврзувачки референдум покажуваат дека 76% од граѓаните гласале да останат во Канада.
- Иницијативата ја покрена премиерката на Алберта, Даниел Смит, со цел да се спротивстави на федералните еколошки регулативи, да ја заштити нафтената индустрија на провинцијата и да изнуди поголема политичка и економска автономија од централната власт во Отава.
- Додека федералистите ја славеа победата, многумина критичари забележаа дека не е за радување фактот што 23% од жителите на богатата провинција се изјасниле за независност. Анкети спроведени во јануари покажаа дека едвај 10% ја поддржува иницијативата за отцепување.
- Мич Силвестр, еден од клучните лидери на сепаратистите, истакна дека движењето за независност „нема да исчезне“.
