Вести › Набрзинка

Макрон му дава втора шанса на Лекорну

11 октомври 2025

Францускиот претседател Емануел Макрон повторно му го даде премиерскиот мандат на Себастијан Лекорну, кој веќе поднесе оставка од функцијата во понеделникот, уште пред да го одржи првиот состанок со својот претходен кабинет.
Макрон се надева дека лојалниот Лекорну ќе успее до понеделник да го подготви буџетот за 2026 година и да го протурка во поделеното Национално собрание.
Десничарите на Марин ле Пен категорично бараат оставка од Макрон и распишување вонредни претседателски избори, како обид за излез од политичката криза. Макрон има уште 18 месеци од мандатот во Елисејската палата и рејтинг од едвај 14%.
„Владата Лекорну 2 на Емануел Макрон, кој нема допир со реалноста, е лош виц, демократски срам и понижување на Французите“, оцени лидерот на Национален собир, Жордан Бардела.
За да го поддржат буџетот, левичарите бараат Макрон да се откаже од пензиската реформа, која ја зголемува возраста за заминување во пензија и да воведе даноци за богатите. Во спротивно ќе инсистираат на предвремени парламентарни избори.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор