- Од Софија, од Солапро Холдинг АД, деновиве ни стигна барање да демантираме наводи од статија на ИРЛ (овде) која ја бевме пренеле во истава оваа рубрика „Набрзинка“ (овде).
- Викаат „ Како странски инвеститор во Р. Северна Македонија, написот на ИРЛ го доживуваме како удар врз бизнис заедницата од странство и особено од блиска земја од соседството.“ (овде)
- ИРЛ добиле деманти и од нив и од Кочо Анѓушев -речиси идентични и речиси синхронизирано - дека не постои ни директна ни индиректна поврзаност меѓу нив.
- ИРЛ удриле втора рака проверка на фактите и документите и имаат нова статија на таа тема, во која заклучуваат дека ги потврдиле своите првични наоди.
- Првпат по втората светска војна, владата на САД побара од автомобилските компании да произведуваат оружје, бидејќи војната против Иран и воената поддршка за Украина ги исцрпеа американските залихи.
- Дискусиите почнале уште пред војната во Иран, велат изворите на Волстрит џурнал. Пентагон ја претставил иницијативата како „прашање од национална безбедност“. Високи функционери веќе разговарале со директорите на Џенерал Моторс, Форд, Ошкош, ЏЕ Ероспејс и на други компании за пренамена на нивните погони и работници за производство на муниција, борбени транспортери и воена опрема.
- Неодамнешното барање на Пентагон за буџет од 1.500 милијарди долари опфаќа зголемување на инвестициите за производство на муниција и беспилотни летала.
- Администрацијата на Трамп побара помош од Џенерал Моторс и од Форд за време на пандемијата на ковид, кога тие произведоа десетици илјади медицински вентилатори.
- Фабриките во Детроит целосно го запреа производството на коли за време на Втората светска војна, кога своите погони ги пренаменија за бомбардери и за мотори за авиони и камиони.
- Уште пред да го добие мандатот за формирање влада, Петер Маѓар го повика унгарскиот претседател Тамаш Шуљок да поднесе оставка. На церемонијалното добивање на мандатот му се закани со притисок од Парламентот ако одбива самиот да замине.
- „Тамаш Шуљок е неспособен да го отелотвори единството на унгарската нација. Не е способен да биде чувар на владеењето на правото во Унгарија. Не е способен да биде морален стандард и пример за унгарскиот народ“, изјави Маѓар на прагот на претседателската палата.
- Лидерот на партијата Тиса оцени дека Унгарците на парламентарните избори во неделата не гласале за нов состав на Парламентот и за промена на владата, туку за „промена на режимот“.
- Маѓар се закани дека една од првите одлуки на неговата влада ќе биде привремено прекинување на вестите на државните радио и телевизиски станици.
- На забелешката дека замолкнувањето на државната телевизија е спротовно на законот, тој одговори: „Не ги исполнивте обврските од законот за медиуми... Кога ме обвинувате дека го кршам законот, тоа е како крадец во продавница да повикува полиција“.
