- Интернет-компанијата Јаху би го купила браусерот Хром, ако федерален суд му наложи на Гугл да го продаде за да нема монополска позиција на пазарот за пребарување содржини.
- „Хром е веројатно најважниот стратегиски играч во мрежата. Ние би биле во позиција да го купиме“, изјави Брајан Провост, главен директор на пребарувачот на Јаху. Тој ја процени вредноста на Хром на „неколку десетици“ милијарди долари.
- По ланската судска пресуда дека Гугл нелегално го монополизирал пазарот на пребарувачи, се води судски процес за начините како да му се разбие монополската позиција. Министерството за правда и неколку сојузни држави бараат да му се нареди на Гугл да го продаде Хром.
- Компанијата Аполо, која го купи Јаху, настојува да го ревитализира како најпопуларен пребарувач, позиција што ја изгуби од Гугл пред две децении. Јаху развива нов браусер, но поефикасно би било да преземе готов и докажан производ.
- За купување на Хром отворено е заинтересиран и Опен АИ.
- Јордан и Обединетите Арапски Емирати почнаа од авиони да пуштаат пакети со храна и друга хуманитарна помош во Газа. Денеска со падобрани испорачале околу 25 тони храна.
- Хуманитарни организации повеќе пати предупредија дека доставувањето пакети со падобрани ни од далеку не е доволно за да ги задоволи потребите на Палестинците. Потребни се 160 летови за да се достави по едвај еден оброк за жителите на Газа.
- Камионите со помош што денеска беа пропуштени беа нападнати од толпа гладни Палестинци.
- Израелските сили објавија дека секој ден по 10 часа ќе ја прекинат офанзивата против Хамас, за да дозволат доставување помош со камиони. Илјадници тони хуманитарна помош се спремни да бидат доставени до изгладнетите палестински цивили.
- Американскиот претседател Доналд Трамп изјави дека САД ѝ дале на Газа 60 милиони долари, а никој не им се заблагодарил.
- Унгарската влада нема да го поддржи седумгодишниот буџет на ЕУ сè додека Брисел не ги деблокира сите суспендирани европски средства, порача премиерот Виктор Орбан.
- Европската комисија неодамна поднесе предлог на буџетот од 2028 до 2034, тежок две милијарди долари за кој се вели дека ги приоретизира одбраната и конкурентноста на европската економија.
- Последниве 15-тина години Орбан редовно се судира со Брисел околу миграциската политика и ограничувањата на правата на ЛГБТ+ заедницата. ЕУ суспендираше милијарди евра помош за Унгарија, бидејќи се одолговлекуваат недоразбирањата околу владеењето на правото.
- „Ваков буџет ќе ја уништи Европската унија,“ гласеше првата проценка на Орбан на предлогот на Урсула фон дер Лајен.
