- Ни левиот ни десниот политички блок во Данска не го добија потребното мнозинство (90 места) на парламентарните избори во земјата.
- Владејачките социјалдемократи на премиерката Мете Фредериксен остануваат најголема партија во Данска но во однос на претходните избори во 2022 година изгубија 12 мандати.
- Ова е нивен најслаб резултат од 1903 година.
- За идна влада Фредериксен ќе треба да прави широка коалиција во која Умерените на Расмунсен ќе имаат улога на „кингмејкер.“
- Најголем скок на последниве избори имаат десничарите од Данската народна партија. Освоија речиси тројно повеќе од претходните избори: имаа 2,6% и пет мандати, сега освоија 9,1% и 16 мандати. Се фокусираа на проблемот со имиграцијата, данокот на гориво и традиционални десни теми со што одземаа добар дел од десните гласачи во Данска.
- Меѓународниот кривичен суд ја затвори долгогодишната истрага за злосторства извршени од американските сили во Авганистан по 2003 година.
- Првичната истрага беше одобрена пред шест години, но долго време беше замрзната. Судскиот совет сега заклучи дека Обвинителството повеќе не е способно ефективно да спроведува истраги и да обезбедува докази, што дополнително се усложнува поради времето што изминало од извршувањето на наводните злосторства.
- Ќе продолжи посебен случај „Ситуацијата во Авганистан II“, кој се фокусира на наводни злосторства на талибанците по август 2021 година, вклучително и прогон на жени и девојчиња. Меѓународниот кривичен суд веќе објави налози за апсење на високи талибански лидери.
- САД не се членка на МКС и ја отфрлаат неговата надлежност врз американските државјани. Вашингтон воведе санкции против судии и обвинители откако Судот објави меѓународна потерница по израелскиот премиер Бенјамин Нетанјаху поврзана со злосторства во Газа.
- Американскиот државен секретар Марко Рубио минатата недела го обвини Судот дека „го користи меѓународното право како инструмент на глобалните елити“.