Вести › Набрзинка

И ЕУ побара тајм-аут од 90 дена

10 април 2025

Европската Унија објави дека 90 дена нема да ги воведе најавените царини за увоз на американски производи, реципрочно на потегот на Доналд Трамп.
26 членки на ЕУ (сите освен Унгарија) вчера одобрија три пакети царини за САД. Првиот, што требаше да стапи на сила на 15 април, опфаќаше производи во вредност од 3,9 милијарди евра, вториот на 15 мај уште 13,5 милијарди и третиот од 1 декември стоки во вредност од 3,5 милијарди евра.
„Европската Унија сака да им даде шанса на преговори“, изјави претседателката на Европската комисија, Урсула фон дер Лејен.
И европските берзи скокнаа, но не толку високо како американските, како резултат на паузата од 90 дена за тарифите што ја најави Трамп.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор