- Руската нафтена компанија Лукоил решила да го продаде сиот свој имот во странство на групацијата Гунвор на шведскиот милијардер Торбјорн Торквист.
- Лукоил беше принуден на овој потег поради санкциите од САД, кои ѝ ги блокираа трансакциите. „Лукоил интернешнел“, со седиште во Виена, располага со стотина разни имоти во повеќе од 50 земји во светот, вклучувајќи и бензиски пумпи во Македонија.
- Гунвор со седиште во Женева е една од најголемите независни трговски компании во светот. Од основањето во 2000 година, сега има бизниси во повеќе од 20 земји. Торквист ја почнал кариерата во нафтената индустрија во „Бритиш петрол“, а во деведесетите години се преселил во Русија. Заедно со Генадиј Тимченко, близок пријател на Владимир Путин, го формирале Гунвор, со цел да тргуваат со руска сурова нафта во Европа. Бизнисот го прошириле со јаглен, метали и гас, како и со инвестиции во нафтоводи, гасоводи и рафинерии.
- Во 2012 Гунвор бил обвинет за подмитување функционери во Конго и во Брегот на Слоновата Коска, а во 2019 година бил казнет од САД поради прекршување на санкции за Русија. Тимченко ги продал своите акции во фирмата кога во 2014 година му биле објавени санкции.
- Норвешката полиција синоќа го уапсила Мариус Борг Хојби, 29-годишниот син на принцезата Мете-Марит и посинок на принцот Хакон, поради нови обвинувања за нанесување телесни повреди, закани со нож и прекршување на забраната за движење.
- Поради новите обвиненија може да биде задржан во притвор четири недели.
- Хојби утре требаше да се појави на суд во врска со посебно обвинение од 38 точки за силување, семејно насилство, напад и поседување дрога. Му беше дозволено да се брани од слобода.
- Случајот беше отворен во 2024 година, откако полицијата го осомничи Хојби за физички напад врз жена со која бил во врска. Тој призна дека ѝ нанел телесни повреди на жената додека бил под дејство на кокаин и алкохол и дека го оштетил нејзиниот стан. Ги отфрла обвиненијата за силување.
- Исламската Република Иран сега ги смета за „терористички“ војските на сите членки на Европската Унија, како реципрочен одговор откако ЕУ ја прогласи иранската Револуционерна гарда за терористичка група.
- „Со обидот да ја нападнат Гардата, која всушност е најголемата пречка за ширење на тероризмот во Европа, Европејците пукаа во себе. Преку слепа послушност кон Американците, донесоа одлука против интересите на сопствениот народ“, изјави претседателот на парламентот, Мохамед Багер Калибаф, кој порано беше командант на Револуционерната гарда.
- Како симболичен протест, сите пратеници на седницата биле облечени во униформи на Гардата.
- Министерството за надворешни работи објави дека ова е „минималната контрамерка“ на Техеран. Биле разгледани низа мерки и на надлежните тела им биле испратени предлози за одговор на „незаконскиот, неразумен и многу погрешен потег на ЕУ“.
- Портпаролот Есмаил Багеи додаде дека се повикани на разговор сите амбасадори на ЕУ во Техеран.
