Најмалку 34 луѓе загинаа и 117 се ранети при рускиот напад со балистички проектили врз Суми. Ова е најкрвав напад врз Украина во оваа година.
Министерот за внатрешни работи на Украина изјави дека проектилите погодиле цивилни цели. Загинале луѓе во автомобили, во градскиот превоз и во домови. Проектилите наводно содржеле касетни бомби.
Претседателот Володимир Зеленски во интервју за ЦБС му порача на Доналд Трамп да не ѝ верува на Русија и го покани да ја посети Украина пред да преговара со Москва.
„Ова е ужасен напад. Ме известија дека направиле грешка“, изјави Трамп за нападот.
Унгарската влада нема да го поддржи седумгодишниот буџет на ЕУ сè додека Брисел не ги деблокира сите суспендирани европски средства, порача премиерот Виктор Орбан.
Европската комисија неодамна поднесе предлог на буџетот од 2028 до 2034, тежок две милијарди долари за кој се вели дека ги приоретизира одбраната и конкурентноста на европската економија.
Последниве 15-тина години Орбан редовно се судира со Брисел околу миграциската политика и ограничувањата на правата на ЛГБТ+ заедницата. ЕУ суспендираше милијарди евра помош за Унгарија, бидејќи се одолговлекуваат недоразбирањата околу владеењето на правото.
„Ваков буџет ќе ја уништи Европската унија,“ гласеше првата проценка на Орбан на предлогот на Урсула фон дер Лајен.
Кинескиот премиер Ли Чијан предлага создавање глобална организација за соработка, координација и безбедност на развојот на вештачката интелигенција. На отворањето на Светската конференција за ВИ во Шангај, Ли ја опиша вештачката интелигенција како „нов мотор за развој“, но забележа дека секоја земја има сопствени регулативи.
„Глобалното управување со ВИ е фрагментирано. Има големи разлики во концептите за регулација и правилата. Мора да ја засилиме координацијата и да формираме глобална рамка за управување со ВИ“, изјави Ли.
Без да ги спомне САД и нивната забрана за извоз на најсовремени чипови во Кина, Ли предупреди дека ВИ може да биде „ексклузивна игра“ за неколку големи земји и компании.
На годишната конференција во Шангај, спонзорирана од кинеските власти, учествуваат истакнати експерти и лидери од светот. Меѓу говорниците се Џефри Хинтон, познат како „Кумот на ВИ“ и поранешниот директор на Гугл, Ерик Шмит. Досега редовно учествуваше и Илон Маск, но годинава нема да се обрати.
Повеќе од 800 светски компании ќе претстават 3.000 хај-тек производи, 40 големи јазични модели, 50 уреди со ВИ и 60 роботи.
