- Скопската градoначалничка го разрешила вд директорот на ЈП Комунална хигиена затоа што оној кретен со пиштолот кај Мавровка му бил брат.
- На разрешениот Зуди Енузи му се признава одлично и професионално менаџирање на јавното претпријатие но „мојот етички кодекс не дозволува тој да продолжи да раководи со претпријатието“, вели Данела Арсовска.
- Што вика истиот тој кодекс, до кое колено важи овој преглуп принцип?
- Белата куќа настојува да преземе 10% од акциите на технолошкиот гигант Интел како накнада за тоа што го поддржуваат со субвенции, согласно Законот за чипови усвоен во 2022 година од администрацијата на Џо Бајден. Веднаш по оваа вест акциите на Интел скокнаа за 7,5% на њујоршката берза.
- „Зошто да ѝ даваме субвенции на компанија од 100 милијарди долари? Што значи тоа за Американците што плаќаат данок? Одговорот на Доналд Трамп е дека треба да добиеме учество за нашите пари. Ќе ги испорачаме парите што ги вети администрацијата на Џо Бајден, но за нив ќе добиеме акции“, објасни министерот за трговија Хауард Лутник.
- Министерот за финансии Скот Бесент најави дека евентуалното преземање акции нема да ги обврзе владините агенции да купуваат чипови од Интел.
- Невообичаената мерка е обид да му се помогне на производителот на чипови да се врати на доминантната позиција, откако почна да ја губи трката од Нвидија, корејската Самсунг и тајванската ТСМЦ, особено на пазарот на напредни чипови за ВИ.
- САД издејствуваа и дил со Нвидија и АМД, кои се согласија да платат специјален данок од 15% од својот приход во Кина за да добијат лиценца за извоз на напредни чипови во Кина.
- Министерот за одбрана Израел Кац го одобри планот за окупација на градот Газа и за таа цел авторизираше мобилизација на околу 60.000 припадници на резервниот воен состав. Ќе бидат повикани да се јават на должност во септември.
- Резервистите нема да бидат ангажирани во урбаните средини, туку ќе им чуваат отстапница на единиците од активниот состав што ќе ја спроведуваат воената операција. Со резервисти ќе бидат зајакнати и авијацијата, разузнавачките центри и логистичките мрежи.
- Со оваа одлука Израел практично го отфрла новиот мировен предлог за прогласување 60-дневен прекин на огнот, во кој Хамас би ослободил израелски заложници.
- Хамас вчера го прифати египетско-катарскиот предлог. Посредниците се оптимисти дека и Израел би можел да го прифати до петок.
