- Лом, ќе биде лом, само една ослободителна, сите други казни ќе бидат високи и највисоки, му најавила Вилма Русковска на Бојан Јовановски од некогашната 1ТВ, еден ден пред судијката Добрила Кацарска да ги обелодени драконските казни за собраниските инциденти од 27-ми април.
- Во подкаст кај Стефан Лазаров, Боки 13 читаше телефонски пораки меѓу него и Русковска во која таа му ги најавува висините на казните, му бара новинари за одредени теми, сугерира што да биде прашано, се интересира за вработување на нејзин роднина во СЈО....
- Околу проектите и инвестициите кои беа предмет на обвинението против Јовановски, Боки 13 рече дека не биле можни без Заев (за кој кажа дека е човек кој верува на своите лаги), Стефан Богоев, Кирацовски, Ременски...
- Беше спомната и Сања Лукаревска од УЈП за која Јовановски кажа дека е поврзана со скандал тежок повеќе стотици илјади евра и Александар Кирацовски (некогашен генерален секретар на СДСМ), кому Силјан Мицевски, според Боки, на рака му дал коверт со пари.
- Подкастот кој бележи рекордна гледаност, кај нормален човек предизвикува мачнина заради трулоста на институциите и заради тоа како сите тие биле поврзани, како си се викале нагалено (Боки ја викал Русковска „Вилмич“), си оделе на гости, се тинтрале и слично, додека правеле спрдачина од правните процедури, нормите и нормалноста.
- Платформата Truth Social на Доналд Трамп понуди нова услуга за привилегиран и ран пристап до објави на најактивните профили. Иако не е директно спомнат, се алудира на профилот на Трамп, кој има 13 милиони следбеници.
- Бизниси и лица што може да си дозволат да плаќаат 100.000 долари месечно за услугата Truth API ќе имаат „директен и лиценциран пристап во реално време на објавите на платформата“. Другите ќе имаат пристап до објавите со задоцнување.
- Критичарите тврдат дека услугата е очигледен пример за манипулација на пазарот и тргување со инсајдери. Трамп постојано преку Truth Social ги објавува своите најважни одлуки, особено оние што се поврзани со војната во Иран и со царините. Досега имало низа случаи на добивки од сомнителни трансакции на берзите и од облози направени непосредно пред претседателот да објави промени во политиката.
- Сенаторите Адам Шиф и Елизабет Ворен ја повикаа Комисијата за хартии од вредност да ја испита новата услуга и да истражи дали Truth Social го крши законот. „Се чини дека ова е скандалозна злоупотреба на функцијата на претседателот за негова лична корист што ги поткопува секојдневните инвеститори и интегритетот на нашите пазари, а воедно ги збогатува Волстрит и другите богати инсајдери“, напишаа сенаторите.
- Визуелна истрага на Њујорк тајмс покажува дека американските сили во четвртокот фрлиле бомба од 900 килограми врз семејна куќа на иранскиот остров Кешм во Ормускиот проток. Загинале маж, жена и нивниот двегодишен син, а две други деца биле извлечени живи од урнатините.
- Во околина на куќата, во густо населениот кварт Чах-Тангу, не е лоциран објект што би можел да биде потенцијална воена цел. Нема ни извештаи за воени жртви при нападот – информации што иранските власти вообичаено ги објавуваат. Во истиот бран напади биле погодени два магацини на приодите кон градот.
- Врз основа на видеоснимки, сателитски снимки, големината на кратерот и фрагментите од бомбата, експерти за оружје заклучиле дека нападот одговара на дејство на американска бомба „Марк-84“ со систем за наведување JDAM, една од најразорните во конвенционалниот арсенал на САД.
- Бомбата била детонирана по ударот и направила кратер со дијаметар од 10 метри. Овој тип бомби типично се користат за уништување згради, железнички јазли и комуникациски центри.
- Американската централна команда не објави што било гаѓано во населбата во Кешм. Соопшти дека ги разгледува извештаите за цивилни жртви, но упорно тврди дека никогаш не нишани кон цивили“.
