- Белата куќа во последен час ја одложила намерата да отпушти 10% од вработените во НАСА, во рамките на акцијата за кратење непотребни трошоци од федералниот буџет. Одлуката не значи дека нема да има отпуштања по некој месец.
- Со метлата требаше да бидат опфатени повеќе од 1.000 вработени во Вселенската администрација. Одделението за владина ефикасност ДОГЕ на Илон Маск спроведе ревизија во десетте центри на НАСА.
- Причината за одложување на отказите не е објавена, но извори на „Арс техника“ тврдат дека тоа го побарал Џаред Ајзекман, астронаутот што од претседателот Доналд Трамп е номиниран за нов шеф на НАСА.
- Околу 750 вработени веќе ја прифатиле понудата од владата да добијат отпремнина за да заминат до септември. По околу 1.000 вработени и онака ја напуштаат НАСА секоја година, па се избегнува да им се плати отпремнина на оние што веќе решиле да заминат на други места.
- Врховниот суд на Косово ја потврди одлуката за забрана на носење хиџаб во училиштата, сметајќи дека е во согласност со кодексот на облекување утврден од Министерството за образование, наука, технологија и иновации.
- Со тоа судот ја отфрли тужбата од организацијата Арита која тврди дека забраната за носење шамија во јавните образовни институции е облик на дискриминација. Во нивната тужба се наведува дека бројни девојки биле исклучени од училиштата или им било забрането да посетуваат настава само затоа што носеле шамија.
- Исламската заедница на Косово своевремено остро се спротивстави на одлуката велејќи дека шамијата не е „религиозна униформа“, туку дел од религиозната обврска на секоја муслиманка.
- Претседателот Доналд Трамп им се закани на граѓаните на Њујорк дека ќе ги остави без федерални фондови ако го изберат Зохран Мамдани за градоначалник.
- „Ако комунистичкиот кандидат Зохран Мамдани победи на изборите, малку е веројатно дека ќе придонесувам со федерални средства, освен потребниот минимум, за мојот сакан прв дом. Не сакам да фрлам добри пари“, порача Трамп.
- Претседателот не решава колку пари кој град добива од федералната влада. Откако Белата куќа ја поништи одлуката за испраќање 34 милиони долари за Њујорк заради заштита од тероризам, федерален судија ја поништи блокадата, која ја оцени како „арбитрарна, каприциозна и грубо прекршување на законот“.
- Трамп ги повика њујорчани да го дадат својот глас за поранешниот демократски гувернер Ендру Куомо, кој настапува како независен кандидат, а не за републиканскиот Куртис Слива. „Секој глас за Слива е глас за Мамдани. Повеќе сакам да победи демократ, кој беше успешен, отколку комунист без искуство и со историја на целосен и тотален неуспех“, порача Трамп.
- Гласањето е денеска. Последните анкети покажаа дека рејтингот на Мамдани е 46%, на Куомо е 32%, а на Слива 16,3%.
