- Државната Агенција за електронски комуникации распиша оглас за набавка на 7 автомобили, со вкупна вредност од околу 200 илјади евра. Едно возило од 44 илјади евра и шест автомобили од по 25 илјади евра.
- Според спецификациите на огласот за поскапиот автомобил, од опрема мора да поседува камера со приказ од 360 степени, ЛЦД екран од најмалку 10 инчи, загревање на предни и задни седишта и на волан, безжичен полнач за телефон од најмалку 15 вати, како и затемнети задни стакла со УВ заштита. Бојата треба да биде црна металик.
- Директор на АЕК од крајот на минатата година е Јетон Акику, кадар на ДУИ.
- Група од 25 мажи во униформи на Нацистичка Германија преминале во Швајцарија преку планинскиот масив Вилдхорн и биле пресретнати и сослушани од кантонската полиција во Берн.
- Во групата имало државјани од повеќе европски земји и од САД. Полицијата ги легитимирала, ги запишала нивните податоци и побарала да ги соблечат униформите со нацистички симболи „за да избегнат потенцијални судири со трети страни“.
- Според Кривичниот закон, полицијата немала друг начин да интервенира. Носењето нацистички симболи не е забрането во Швајцарија, објасни портпаролката Дебора Цауг.
- Повеќето партии, кантони и здруженија во Швајцарија се за забрана за јавно носење нацистички симболи во јавноста. Во процес на консултација е закон за забрана за нацистички поздрави, истакнување свастики, ознаки на СС-дивизијата, но и нумеричките кодови како „18“ и „88“, кои асоцираат на „Адолф Хитлер“ и „Хајл Хитлер“. Во зависност од контекстот, ќе може да биде изречена парична казна од 200 франци.
- Врховниот суд на Бразил воведе целосен медиумски карантин за поранешниот претседател Жаир Болсонаро. Судијата Александер де Мораеш забрани споделување на какви било видео или аудио снимки со изјави на Болсонаро и нивни транскрипти.
- Мораеш објаснува дека со таква пренесена содржина Болсонаро може да ја заобиколи забраната за присуство по медиумите. Секое прекршување ќе заврши со итно спроведување на поранешниот претседател во затвор.
- Во петокот по барање од јавниот обвинител на Болсонаро му беше забрането да дава изјави и интервјуа и му беа наметнати други мерки со цел да се спречи обид за бегство од правосудните органи. Принуден е да носи електронска алка на глуждот заради следење на неговата локација, не смее да излегува од домашен притвор ноќе и за време на викенди. Забранета му е комуникација со други лица што се под истрага, со странски дипломати, дури и со сопствениот син Едуардо, кој е во САД.
- Наспроти овие мерки, Болсонаро продолжи да дава изјави во јавноста. При посета на Секретаријатот за затвори во Бразилија ја оцени казната што му е наметната како „врвно понижување“. Во интервју за Ројтерс, го нарече судијата Мореаеш „главен диктатор на Бразил“.
- На десничарскиот популист му се суди за наводно планирање државен удар против владата на неговиот наследник, Луиз Инасио Лула да Силва, од кого загуби на изборите во 2022 година.
